फायर सुरक्षा यंत्रणा निष्क्रिय; प्रदूषण नियंत्रण मंडळाच्या भूमिकेवरही संशय!
रोहे (धाटाव) : रोहेजवळील एमआयडीसी औद्योगिक वसाहतीतील एका ट्रान्सपोर्ट कंपनीच्या सुमारे ९०० मीटर लांबीच्या गोदामाला मंगळवारी सकाळी भीषण आग लागली. सुदैवाने कोणतीही जीवितहानी झाली नसली तरी गोदामातील मोठ्या प्रमाणावरील साहित्य जळून खाक झाले आहे. स्थानिक अग्निशमन दलाच्या दोन गाड्या आणि दीपक नायट्रेट कंपनीची गाडी घटनास्थळी दाखल झाल्याने ही आग आटोक्यात आली.
या आगीचे नेमके कारण अद्याप स्पष्ट झालेले नसले तरी प्राथमिक माहितीनुसार, इलेक्ट्रिक शॉर्टसर्किट हे संभाव्य कारण असल्याचा अंदाज व्यक्त केला जात आहे. मात्र, इतक्या मोठ्या गोदामात कोणतीही प्रतिबंधात्मक सुरक्षा उपाययोजना न ठेवता व्यवसाय चालवल्यामुळे कंपनीच्या निष्काळजीपणावर सवाल उपस्थित होत आहेत.
या घटनेनंतर औद्योगिक कंपन्यांच्या निष्काळजी कारभाराचा आणि त्यांना संरक्षण देणाऱ्या शासकीय यंत्रणांचा बुरखा फाटल्याचे स्पष्ट झाले आहे. नागरिकांकडून कंपनी प्रशासन व प्रदूषण नियंत्रण मंडळावर कठोर कारवाईची जोरदार मागणी होत आहे. भविष्यात अशा दुर्घटना टाळण्यासाठी औद्योगिक सुरक्षेविषयी प्रशासन आणि कंपन्यांनी जागरूक होणे अत्यावश्यक आहे. अन्यथा सामान्य नागरिकांच्या जीवावर बेतणाऱ्या दुर्घटना टळणार नाहीत.
