महारक्तदान शिबिरात १०५ रक्तदात्यांचे रक्तदान
सावंतवाडी । प्रतिनिधी : मेडिकल क्षेत्रात कितीही प्रगती झाली असली तरी रक्त निर्माण करता येत नाही. ते मानवालाच रक्तदान करून द्यावे लागते. रक्त दिल्यामुळे रुग्णाचे प्राण वाचू शकतात हे फार मोठे पुण्य आहे. यासाठीच गोवा बांबूळी रुग्णालयात रक्त कमी पडू नये म्हणून अनेक संघटनांनी एकत्र येऊन दिलेले योगदान हे जीवनदान आहे. गोव्याचे व आपले भावनिक नाते आहे या रक्तदान शिबिरामुळे आता आपले रक्ताचे नाते निर्माण झाले आहे, असे प्रतिपादन
सैनिक पतसंस्था महाव्यवस्थापक तथा सिंधू रक्तमित्र संघटनेचे सावंतवाडी तालुकाध्यक्ष सुनील राऊळ यांनी केले.
सिंधुदुर्ग जिल्ह्यातील रुग्ण गोवा मेडिकल कॉलेजच्या रुग्णालयात गेल्यानंतर तिथे रक्ता अभावी रुग्णांचे हाल होत होते. या पार्श्वभूमीवर
सावंतवाडीतील काझी शहाबुद्दीन हॉलमध्ये
सामाजिक बांधिलकी संघटना, सिंधू रक्तमित्र संघटना, युवा रक्तदाता संघटना, राजा छत्रपती शिवाजी चौक, राष्ट्रीय छावा संघटनेच्या माध्यमातून गोवा बांबोळी रुग्णालयातील रुग्णांसाठी सावंतवाडीत महा रक्तदान शिबिर आयोजित करण्यात आले होते. या शिबिराचे उद्घाटन ज्येष्ठ सामाजिक कार्यकर्ते अनिल परूळेकर यांच्या हस्ते झाले.
या शिबिरात १०५ रक्तदात्यांनी रक्तदान केले. यशवंतराव भोसले नॉलेज सिटीच्या २८ विद्यार्थ्यांनी या रक्तदान शिबीरात सहभाग घेतला. त्याशिवाय गव्हाणकर कॉलेज, आयटीआय, आरपीडी हायस्कूल, श्री पंचम खेमराज महाविद्यालय अशा शाळांच्या विद्यार्थ्यांनी देखील रक्तदान शिबिरात सहभाग घेतला.
सिंधुदुर्ग जिल्ह्यातील रुग्ण गोव्यात गेल्यानंतर रक्ताअभावी त्यांचा प्राण जाऊ नये म्हणून या संघटनांनी खबरदारी घेऊन रक्तदान करावे म्हणून माजी नगराध्यक्ष बबन साळगावकर यांनी आवाहन केले होते. यामध्ये देव्या सूर्याजी, संतोष तळवणेकर, रवी जाधव ,संजय पेडणेकर आदी मान्यवरांनी सहभाग घेतला. सामाजिक कार्यर्क्ते रवी जाधव बांबुळी गोवा येथे रुग्ण घेऊन गेले होते, त्यावेळी त्यांना रक्ताची गरज भासली. त्यातून हे महा रक्तदान शिबिर झाले असल्याचे मत माजी नगराध्यक्ष बबन साळगावकर यांनी व्यक्त केल.
यासाठी योगदान देणाऱ्या महाविद्यालयीन विद्यार्थी, संस्थां आणि रक्तदात्यांचे यावेळी त्यांनी आभार व्यक्त केले.
यावेळी गोवा मेडिकल कॉलेजचे डॉ. संजय कोरगावकर, डॉ राजेश नवागुंळ, निखिल गावडे, सिंधू रक्त मित्र संघटनेचे सुनील राऊळ, युवा रक्तदाता संघटनेचे देव्या सूर्याजी, आनंद रासम, माजी नगरसेवक विलास जाधव, सुरेश भोगटे, दिपाली भालेकर, सामाजिक बांधिलकीचे अध्यक्ष रवी जाधव ,राजा छत्रपती शिवाजी चौकचे बंटी माटेकर, छावा संघटनेचे संतोष तळवणेकर, पत्रकार संघटनेचे अध्यक्ष प्रवीण मांजरेकर,परिट समाज अध्यक्ष दिलीप भालेकर, माजी नगरसेवक संजय पेडणेकर, रिक्षा संघटनेचे सुधीर पराडकर, सिंधू रक्तमित्र संघटनेचे संजय पिळणकर, अफरोज राजगुरू ,सतीश बागवे ,संदीप नाईक, शैलेश नाईक, अशोक पेडणेकर,कल्याण कदम आनंद वेंगुर्लेकर, मोहन जाधव तसेच जीएमसीचे डॉक्टर व कर्मचारी उपस्थित होते.
Sindhudurg
