शहरासाठी कोट्यावधी रुपयांचा निधी उपलब्ध करून दिल्याबद्दल व्यक्त करणार ऋण
संस्थानचे युवराज लखमराजे भोंसले यांच्या नेतृत्वाखाली सत्कार समिती गठीत
सावंतवाडी । प्रतिनिधी : सावंतवाडी शहराच्या विकासासाठी कोटयावधी रुपयांचा निधी उपलब्ध करून देणारे राज्याचे मुख्यमंत्री एकनाथ शिंदे यांचा सावंतवाडी शहरवासियांतर्फे मंगळवारी भव्य नागरी सत्कार केला जाणार आहे. त्यासाठी सावंतवाडी संस्थानचे युवराज लखम राजे भोसले यांच्या अध्यक्षतेखाली सत्कार समिती गठीत करण्यात आली असल्याची माहिती शालेय शिक्षण मंत्री दीपक केसरकर यांनी दिली.
दरम्यान, आगामी काळात सावंतवाडी शहर अद्ययावत करण्यात येणार असून सावंतवाडीची हस्तकला जपण्यासाठी या ठिकाणी म्युझियम बांधण्यात येणार आहे. त्यामुळे हे ऐतिहासिक शहर अधिकच सुंदर होत असताना सगळ्यांचे सहकार्य अपेक्षित असल्याचेही केसरकर यांनी सांगितले.
मुख्यमंत्री एकनाथ शिंदे यांच्या सावंतवाडी दौऱ्याच्या पार्श्वभूमीवर मंत्री दीपक केसरकर यांनी आपल्या निवासस्थानी पत्रकार परिषद घेत माहिती दिली. ते म्हणाले, मुख्यमंत्री एकनाथ शिंदे यांनी आत्तापर्यंत सावंतवाडी शहरासाठी जवळपास ९० कोटी पेक्षा जास्त निधी दिला आहे. त्यामुळे सावंतवाडी शहरावर त्यांचे असलेले प्रेम लक्षात घेता त्यांचा उद्याच्या भूमिपूजन कार्यक्रमानिमित्त जाहीर नागरी सत्कार केला जाणार आहे. यासाठी सावंतवाडी संस्थानचे युवराज लखम सावंत भोसले यांच्या अध्यक्षतेखाली नागरी सत्कार समिती गठीत करण्यात आली आहे.
मुख्यमंत्री एकनाथ शिंदे यांच्या हस्ते येथील भाजी मंडईच्या नव्या इमारतीच्या कामाचे भूमिपूजन होणार आहे. या इमारतीसाठी साडे पंधरा कोटी रुपयाच्या निधीचा पहिला टप्पा पालिकेकडे जमा झाला आहे. एकूण दोन टप्प्यात हे काम होणार असून वर्षभरात इमारतीचे काम मार्गी लावण्यात येणार आहे. परंतु हे करताना व्यापारी वर्गाचे अस्तित्वातले धंदे थांबू नयेत यासाठी त्यांचे तात्पुरते स्थलांतर करण्यात येणार आहे. नविन भाजी मंडईमुळे शहरातील पार्किंगचा प्रश्नही कायमचा मिटणार आहे.
तर बाळासाहेब ठाकरे आपला दवाखाना तसेच द्रोणाचार्य पुरस्कार प्राप्त कै. रमाकांत आचरेकर क्रिकेट ड्रेसिंग रूम व क्रीडा संकुलाचेही भूमिपूजनही होणार आहेत. तसेच दोडामार्ग रुग्णालय, सावंतवाडी शासकीय पर्णकुटी विश्रामगृह, याशिवाय दोडामार्ग तालुक्यातील भेडशी येथील तालुका क्रीडा संकुल व ग्रामीण रुग्णालयाच्या कामाचेही भूमिपूजन ऑनलाईन पद्धतीने करण्यात येणार असल्याची माहितीही त्यांनी यावेळी दिली.
जिमखाना मैदानाची रुंदी वाढवण्यात येणार आहे. त्यामुळे क्रिकेट मैदानाबरोबरच कबड्डी खो-खो बास्केटबॉल व इतर क्रीडा मैदान या ठिकाणी उभारली जाणार आहेत. परिपूर्ण असे स्पोर्ट कॉम्प्लेक्स येथे होणार आहे. येथील बॅरिस्टर नाथ पै सभागृहाचे काम अंतिम टप्प्यात आहे. येत्या पंधरा दिवसात त्याचेही लोकार्पण केले जाणार असल्याचेही त्यांनी सांगितले.
सावंतवाडी शहराची लाकडी खेळण्याची परंपरा जपण्यासाठी या ठिकाणी म्युझियम उभारले जाणार आहे. तर मटण मार्केटची इमारतही जुनी झाली असून त्यासाठी निधी उपलब्ध करून दिला गेला आहे. लवकरच हे कामही सुरू केले जाणार आहे. सावंतवाडी बस स्टॅन्ड व शहरातील नाल्यांचे काम हाती घेतले जाणार आहे. त्यामुळे सावंतवाडी शहर सुंदर होत असताना सर्वांच्या सहकार्याचीही आवश्यकता असल्याचे ते म्हणाले.
एकूणच हे सर्व करत असताना
येथील पालकमंत्री तथा बांधकाम मंत्री रवींद्र चव्हाण, केंद्रीय मंत्री नारायण राणे यांच्याबरोबरच उद्योग मंत्री उदय सामंत यांचे सहकार्य आपल्याला मिळाले. त्यामुळे त्यांचे आपण आभारी आहोत, असेही त्यांनी यावेळी स्पष्ट केले.
चौकट
मल्टीस्पेशलिटी हॉस्पिटलचेही लवकरच भूमिपूजन : दीपक केसरकर
सावंतवाडी शहरात होऊ घातलेल्या
मल्टीस्पेशालिटी हॉस्पिटलचा प्रश्न बुधवारच्या कॅबिनेटमध्ये मार्गी लागणार आहे. त्यामुळे आता भूमिपूजन करणे योग्य नसल्याने पुढच्या टप्प्यात ऑनलाईन पद्धतीने मल्टीस्पेशालिटी कामाचे भूमिपूजन होणार असल्याची माहिती मंत्री केसरकर यांनी सांगितले.
