ठरले कोकणातील एकमेव अभियांत्रिकी महाविद्यालय
रत्नागिरी | प्रतिनिधी : टाईम्स ऑफ इंडिया मार्फत घेण्यात आलेल्या “ टाईम्स इंजिनिअरिंग रॅकिंग २०२३” सर्वेक्षणात फिनोलेक्स अॅकॅडमी ऑफ मॅनेजमेंट अँड टेक्नॉलॉजी, रत्नागिरी या अभियांत्रिकी महाविद्यालयाने संपूर्ण भारतामधील १७० उत्कृष्ट अभियांत्रिकी महाविद्यालयाच्या क्रमवारीत राष्ट्रीय पातळीवर १२९ वे स्थान पटकावले आहे. तसेच महाराष्ट्रामध्ये २७ वे व मुंबई विद्यापीठात १४ वे स्थान पटकावले आहे. हे महाविद्यालय या क्रमवारीत कोकणातील एकमेव महाविद्यालय ठरले आहे.
टाईम्स ऑफ इंडिया ग्रुप दरवर्षी देशभरातील अभियांत्रिकी महाविद्यालयांचे मूल्यांकन करण्यासाठी सर्वेक्षण करते. या सर्वेक्षणाच्या आधारावर अभियांत्रिकी महाविद्यालयाचा दर्जा ठरवला जातो. त्यासाठी यावर्षी देशभरातील विविध अभियांत्रिकी महाविद्यालयातून निवडक महाविद्यालयांचे सर्वेक्षण करण्यात आले. या सर्वेक्षणात मुख्यःत्वे महाविद्यालयाची मुलभूत माहिती, पायाभूत सुविधा, प्रशिक्षित शिक्षकवर्ग, शैक्षणिक गुणवत्ता आणि प्रशासन, नोकरीतील संधी, विद्यार्थ्यांचा व्यक्तिमत्व आणि नेतृत्व विकास घडवण्यासाठी महाविद्यालयाकडून प्रयत्न, विद्यार्थ्यांना प्रदान केलेले शैक्षणिक वातावरण आणि शिक्षणातील स्त्रोत, ग्लोबल एक्सपोजर, महाविद्यालयाची माफक फी आणि औद्योगिक क्षेत्राशी महाविद्यालयाचा संपर्क या गोष्टीचा विचार करण्यात आला.
फिनोलेक्स समूहाचे अध्यक्ष कै. श्री. पी. पी. छाब्रिया यांच्या प्रेरणेतून उभे राहिलेले हे महाविद्यालय कोकणामध्ये दर्जेदार अभियांत्रिकी शिक्षणासाठी ओळखली जाते. कोकणातील विद्यार्थ्यांना उच्च प्रतीच्या अभियांत्रिकी शिक्षणाबरोबर व्यवस्थापन आणि व्यक्तिमत्व विकासाचे योग्य प्रशिक्षण प्रदान करून, नामांकित आस्थापनांमध्ये नोकरीच्या संधी उपलब्ध करून देण्यावर ॲकॅडमीचा नेहमी कल राहिला आहे. या महाविद्यालयामध्ये मेकॅनिकल, इलेक्ट्रिकल, कॉम्प्युटर सायन्स अँड इंजिनिअरिंग वीथ आर्टिफिशिअल इंटेलिजन्स अँड मशीन लर्निंग, आय. टी., केमिकल आणि इलेक्ट्रॉनिक्स अॅन्ड टेलीकम्युनिकेशन हे पदवी अभ्यासक्रम, मास्टर ऑफ कॉम्प्युटर अॅपलीकेशन या पदव्युत्तर अभ्यासक्रमाचे शिक्षण देण्यात येते. तसेच मेकॅनिकल व आय. टी या शाखांमध्ये पी. एच. डी अभ्यासक्रम चालवला जातो.
सदर महाविद्यालयाला राष्ट्रीय मूल्यांकन व मानांकन परिषद (नॅक) कडून उत्कृष्ठ श्रेणी प्राप्त झाली आहे.
नुकतेच या अभियांत्रिकी महाविद्यालयाने “द वीक – हंसा रिसर्च बेस्ट कॉलेज सर्वे २०२३” या सर्वेक्षणात मुंबई विद्यापीठामध्ये ६वे स्थान, महाराष्ट्रातील उत्कृष्ट खाजगी अभियांत्रिकी महाविद्यालयाच्या क्रमवारीत २०वे स्थान, खाजगी अभियांत्रिकी महाविद्यालयाच्या क्रमवारीत भारताच्या पश्चिम विभागात राष्ट्रीय पातळीवर २७वे स्थान, उत्कृष्ट खाजगी अभियांत्रिकी महाविद्यालयाच्या क्रमवारीत राष्ट्रीय पातळीवर १८४वे स्थान, उत्कृष्ट सरकारी व खाजगी अभियांत्रिकी महाविद्यालयाच्या क्रमवारीत राष्ट्रीय पातळीवर २१३वे स्थान पटकावले आहे. तसेच हे महाविद्यालय या क्रमवारीत कोकणातील एकमेव महाविद्यालय ठरले आहे.
या यशाबद्दल फिनोलेक्स अॅकॅडमीच्या अध्यक्षा श्रीमती अरुणा कटारा, मॅनेजिंग ट्रस्टी अमृता कटारा व प्राचार्य डॉ. कौशल प्रसाद यांनी सर्व प्राध्यापक व कर्मचारीवर्ग यांचे अभिनंदन केले.
