देवरूख महाविद्यालयाच्या ‘आकांक्षा’ वार्षिक अंकाचा प्रकाशन समारंभ उल्हासपूर्ण वातावरणात संपन्न

 

देवरुख शिक्षण प्रसारक मंडळाच्या आठल्ये-सप्रे-पित्रे कनिष्ठ महाविद्यालयाच्या चौथ्या ‘आकांक्षा’ वार्षिक अंकाचा प्रकाशन समारंभ मान्यवरांच्या उपस्थितीत नुकताच संपन्न झाला. याप्रसंगी व्यासपीठावर संस्था सचिव शिरीष फाटक, ॲड. वेदा प्रभूदेसाई, नितीन शेडगे, प्राचार्य डॉ. नरेंद्र तेंडोलकर, पर्यवेक्षक प्रा. एम. आर. लुंगसे यांची प्रमुख उपस्थिती होती. या कार्यक्रमाची सुरुवात दीप प्रज्वलन व सरस्वती पूजनाने झाल्यावर, सर्वप्रथम शैक्षणिक वर्ष २०२२-२३ मधील महत्त्वाच्या शैक्षणिक-सहशैक्षणिक उपक्रमांवर आधारित महत्त्वपूर्ण घटनांची ग्रंथपाल प्रा. सुभाष मायंगडे व प्रा. धनंजय दळवी यांनी तयार केली एव्ही क्लिप दाखविण्यात आली.
प्राचार्य डॉ. नरेंद्र तेंडोलकर यांनी उपस्थित मान्यवरांचे स्वागत केले. कार्यक्रमाचे अध्यक्ष शिरीष फाटक यांनी प्राचार्य डॉ. तेंडोलकर यांना ‘शिक्षणतज्ञ कै. रामभाऊ परुळेकर आणि मुख्याध्यापक कै. बाबुराव परुळेकर शैक्षणिक कार्य पुरस्कार: २०२३’ प्राप्त झाल्याबद्दल कनिष्ठ महाविद्यालयाच्यावतीने सन्मानित केले. प्राचार्य डॉ. तेंडोलकर यांनी आपल्या प्रास्ताविक मनोगतात वार्षिक अंकाबाबतचा आढावा घेऊन सहभागी विद्यार्थी व मार्गदर्शक शिक्षक यांचे कौतुक केले. यानंतर उपस्थित मान्यवरांनी आकांक्षा अंकाचे प्रकाशन केले.
विद्यार्थिनी श्रुती सागवेकर हीने आपल्या लेखनाबाबतचा अनुभव आणि प्रकाशनाची संधी महाविद्यालयाने दिल्याबद्दल कृतज्ञता आपल्या मनोगतातून व्यक्त केली. कनिष्ठ महाविद्यालय व शाळा व्यवस्थापन समिती अध्यक्षा ॲड. वेदा प्रभुदेसाई यांनी आपल्या मनोगतात वार्षिक अंक हा महाविद्यालयाचा महत्त्वपूर्ण दस्तऐवज असून, याद्वारे विद्यार्थ्यांना आपले विचार मांडण्याची संधी मिळत असल्याचे मत व्यक्त केले. संस्था सचिव शिरीष फाटक यांनी मनोगतात वार्षिक अंकात विद्यार्थ्यांनी केलेल्या लेखनाचे कौतुक करून, यापुढेही विद्यार्थ्यांनी विविधांगी लेखनाचे प्रयत्न सुरू ठेवण्याचे आवाहन याप्रसंगी केले. महाविद्यालयाच्या ग्रंथालयातील ग्रंथसंपदेचा अधिकाधिक उपयोग विद्यार्थ्यांनी करून स्वतःला कायम अपडेट ठेवावे अशी भावना याप्रसंगी व्यक्त केली.
कनिष्ठ महाविद्यालयाच्या या चौथ्या वार्षिक अंकात मराठी, हिंदी व इंग्रजी भाषेतील साहित्य यामध्ये विशेष लेख, कथा, कविता यांच्यासह शैक्षणिक व सह-शैक्षणिक विभागांचे अहवाल, वार्षिक परीक्षांचे निकाल, गुणवंत व पारितोषिक प्राप्त विद्यार्थ्यांची माहिती, विद्यार्थ्यांनी साकारलेल्या कलाकृतींचे फोटो, याचबरोबर संस्था व महाविद्यालयांने विद्यार्थ्यांसाठी उपलब्ध करून दिलेल्या सोयी सुविधांचे माहिती व फोटो, गुणवंत व यशवंत विद्यार्थ्यांच्या कौतुक सोहळ्याचे फोटो, महाविद्यालयात नियमित आयोजित केल्या जाणाऱ्या कार्यक्रम-उपक्रमांची माहिती व फोटो इत्यादी महत्त्वपूर्ण बाबींचा आढावा या अंकामध्ये घेण्यात आला आहे. या वार्षिक अंकाच्या संपादक मंडळामध्ये अध्यक्ष- प्राचार्य डॉ. नरेंद्र तेंडोलकर, संपादक- प्रा. सुवर्णा साळवी, इतर सदस्य- प्रा. सीमा शेट्ये, प्रा. धनंजय दळवी, प्रा. सीमा कोरे आणि ग्रंथपाल प्रा. सुभाष मायंगडे यांचा समावेश आहे.
या कार्यक्रमाचे सूत्रसंचालन प्रा. सुवर्णा साळवी यांनी, तर आभार प्रदर्शन प्रा. सीमा कोरे यांनी केले. या कार्यक्रमाच्या यशस्वीतेसाठी तांत्रिक सहाय्यक संतोष जाधव व महेंद्र मेचकर यांनी मेहनत घेतली. अंकाच्या प्रकाशनासाठी संस्थाध्यक्ष सदानंद भागवत, नेहा जोशी, कुमार भोसले, उपप्राचार्य डॉ.सरदार पाटील तसेच सर्व शिक्षक व शिक्षकेतर कर्मचारी यांनी शुभेच्छा दिल्या.

*फोटो-* आकांक्षा वार्षिक अंकाचे प्रकाशन करताना उपस्थित मान्यवर, संपादक मंडळ व विद्यार्थी.
*छाया-* श्री. महेंद्र मेचकर.