सावंतवाड़ी । प्रतिनिधी : सावंतवाडीतील यशवंतराव भोसले पॉलिटेक्निकतर्फे चालू शैक्षणिक वर्षापासून डिग्री इंजिनिअरिंग कॉलेज अर्थात अभियांत्रिकी महाविद्यालय सुरु करण्यास अखिल भारतीय तंत्र शिक्षण परिषद, नवी दिल्ली यांची मान्यता प्राप्त झाली आहे. ३०० प्रवेश क्षमता असलेल्या यशवंतराव भोसले इन्स्टिट्यूट ऑफ टेक्नॉलॉजी या नवीन महाविद्यालयात मेकॅनिकल इंजिनिअरिंग, इलेक्ट्रिकल इंजिनिअरिंग, कॉम्प्युटर इंजिनिअरिंग व कॉम्प्युटर सायन्स हे अभ्यासक्रम उपलब्ध असल्याचे संस्थेचे कार्याध्यक्ष अच्युत सावंत भोसले यांनी पत्रकार परिषदेत जाहीर केले.
यावेळी संस्थेच्या अध्यक्षा ॲड.अस्मिता सावंत भोसले, सचिव संजीव देसाई, प्रशासकीय अधिकारी सुनेत्रा फाटक, पॉलिटेक्निक प्राचार्य गजानन भोसले, जनसंपर्क अधिकारी नितीन सांडये उपस्थित होते.
सावंतवाडीतील श्री यशवंतराव भोसले एज्युकेशन सोसायटी मार्फत २०१४ साली यशवंतराव भोसले पॉलिटेक्निक हे पदविका अभियांत्रिकी कॉलेज सुरू करण्यात आले. गेल्या नऊ वर्षात कॉलेजने सिद्ध केलेला दर्जा व गुणवत्तापूर्ण शिक्षण याचा आढावा घेऊन देशाच्या अभियांत्रिकी शिक्षणातील सर्वोच्च शिखर संस्था अखिल भारतीय तंत्रशिक्षण परिषद नवी दिल्ली (एआयसीटीई) यांनी भोसले पॉलिटेक्निकचा दर्जावाढ करीत त्याला अभियांत्रिकी पदवी महाविद्यालयाची मान्यता बहाल केली आहे.
चालू शैक्षणिक वर्षापासून कॉलेजचे नाव यशवंतराव भोसले इन्स्टिट्यूट ऑफ टेक्नॉलॉजी असे राहणार असून या ठिकाणी पॉलिटेक्निक व इंजिनिअरिंग डिग्री हे दोन्ही विभाग कार्यरत असतील. डिग्री अभ्यासक्रमांना संलग्नता मिळण्यासाठी मुंबई विद्यापीठाचे ना हरकत प्रमाणपत्र देखील कॉलेजला प्राप्त झाले आहे. यावर्षीपासून बारावी विज्ञान शाखा उतीर्ण विद्यार्थी येथे मेकॅनिकल इंजिनिअरिंग, इलेक्ट्रिकल इंजिनिअरिंग, कॉम्प्युटर इंजिनिअरिंग व कॉम्प्युटर सायन्स या चार शाखांमध्ये प्रवेश घेऊ शकतात.
सिंधुदुर्ग जिल्ह्यातील विद्यार्थ्यांना व्यवसायाभिमुख तंत्रशिक्षण देताना यशवंतराव भोसले पॉलिटेक्निक आपली शैक्षणिक गुणवत्ता कायम जपली. इथे शिक्षण घेऊन बाहेर पडलेल्या शेकडो विद्यार्थ्यांना उत्तम नोकऱ्या मिळाल्या. अनेक विद्यार्थ्यांनी उद्योजक म्हणून नाव कमावले. याच अनुषंगाने कॉलेजला २०१९ मध्ये बेस्ट इमर्जिंग इन्स्टिट्यूट व २०२२ मध्ये बेस्ट पॉलिटेक्निक असे राष्ट्रीय पुरस्कार मिळाले. त्याचबरोबर रायगड, रत्नागिरी व सिंधुदुर्ग या तीनही जिल्ह्यातून एनबीए राष्ट्रीय मानांकन प्राप्त करणारे भोसले पॉलिटेक्निक हे पहिले व एकमेव पॉलिटेक्निक ठरले.
सावंतवाडी सारख्या ठिकाणी अभियांत्रिकी पदवी महाविद्यालय सुरू झाल्यामुळे जिल्ह्यातील विद्यार्थी व पालक वर्गात आनंदाचे वातावरण आहे. सध्या प्रवेश प्रक्रियेचे दिवस सुरु असून अनेक होतकरू विद्यार्थ्यांना जिल्ह्यातच हक्काचे इंजिनिअरिंग कॉलेज उपलब्ध झाले आहे.
मोठया शहरांमध्ये प्रवेशासाठी लागणारा वेळ व पैसा यांची मोठी बचत होणार असल्याने यशवंतराव भोसले इन्स्टिट्यूट ऑफ टेक्नॉलॉजीच्या माध्यमातून एक उत्तम पर्याय जिल्ह्यातील विद्यार्थ्यांना उपलब्ध झाला आहे.
डिग्री कॉलेजचा जिल्ह्यातील विद्यार्थ्यांना होईल फायदा : अच्युतराव भोंसले
संस्थेच्या शैक्षणिक वाटचालीत आम्ही क्वालिटी एज्युकेशनवर सदैव भर दिला. जिल्ह्यात टेक्निकल एज्युकेशनची गरज ओळखून पहिल्या टप्प्यात आम्ही पॉलिटेक्निक सुरू केले. स्किल एज्युकेशनवर लक्ष केंद्रित करत शेकडो तंत्रकुशल विद्यार्थी घडवले. याचाच परिणाम म्हणजे अनेक विद्यार्थी व पालक आम्ही डिग्री इंजिनिअरिंग कॉलेज सुरु करावे यासाठी प्रयत्नशील होते. या सर्वांची मागणी व भविष्याची गरज लक्षात घेता यशवंतराव भोसले इन्स्टिट्यूट ऑफ टेक्नॉलॉजी या दर्जेदार शैक्षणिक सोयी-सुविधा देणाऱ्या महाविद्यालयाची सुरुवात आम्ही करीत आहोत. त्याचा फायदा जिल्ह्यातील विद्यार्थ्यांना नक्की होईल याची मला खात्री आहे.