रत्नागिरी : कोकण विभागीय शिक्षक आमदार ज्ञानेश्वर म्हात्रे यांची आढावा बैठक गोगटे महाविद्यालय रत्नागिरी येथे झाली. यावेळी विविध विषयांवर त्यांनी मार्गदर्शन केले.
यावेळी शिक्षक बदली, सहावा टप्पा सुधारणा करण्याची मागणी करण्यात आली. तर रत्नागिरी जिल्ह्यातील शिक्षक पदे भरण्यासाठी आ. म्हात्रे यांना निवेदन देण्यात आले. त्याशिवाय केंद्रप्रमुख पदाला वेतनवाढ देण्याबाबत निर्णय व्हावा, शिक्षकांची सेवा पुस्तके अद्ययावत करण्यासाठी कॅम्पचे आयोजन करावे, सेवानिवृत्त कर्मचाऱ्यांना गटविमा त्वरीत द्यावा, प्राथमिक व माध्यमिक शिक्षकांची प्रलंबित बिले अदा करावी, पदोन्नती तात्काळ करावी यासारखे अनेक विषय प्राथमिक व माध्यमिक शिक्षणाधिकारी यांचेकडे समक्ष चर्चा करून सोडवण्यासाठी आग्रह यावेळी धरण्यात आला.
यावेळी आपण प्रत्येक महिन्याला आढावा बैठक आयोजित करणार असल्याचे आ. म्हात्रे यांनी सांगितले. कार्यालयीन कामकाजाच्या प्रस्तावावर पंधरा दिवस मुदतीत काम न झाल्यास कर्मचाऱ्यांवर कार्यवाही करण्यास विधानसभा सभागृहात लक्षवेधी करणार असल्याचे सुद्धा सांगितले. यावेळी प्राथमिक उपशिक्षणाधिकारी शिरभाते, माध्यमिक शिक्षणाधिकारी
श्रीमती सावंत, जिल्हाध्यक्ष शिक्षक सेना दिलीप देवळेकर, जिल्हाध्यक्ष मुख्याध्यापक संघ विजय पाटील, शिक्षक सेना राज्य संपर्क प्रमुख राजेश जाधव तसेच विविध संघटनांचे पदाधिकारी यावेळी उपस्थित होते.
