रत्नागिरी : कर्मचार्यांच्या प्रलंबित वैद्यकीय बिलांचे रेकॉर्ड व्यवस्थित न ठेवल्याप्रकरणी जिल्हा परिषद आरोग्य विभागातील आरोग्य सेवकाला मुख्य कार्यकारी अधिकार्यांनी निलंबित केले बुधवारी (दि. ५) सायंकाळी उशिरा ही कारवाई करण्यात आली.
पालकमंत्री उदय सामंत यांनी शनिवारी (ता. १) वैद्यकीय बिलांसंदर्भात जिल्हा परिषदेमध्ये आढावा बैठक घेतली होती. यावेळी जिल्हा आरोग्य विभागासह जिल्हा शल्य चिकित्सकांनाही बोलावण्यात आले होते. यावेळी कर्मचार्यांच्या प्रलंबित बिलांविषयी संबंधित विभागांकडून योग्य माहिती देता आली नव्हती. मंत्री सामंत यांनी तिव्र नाराजी व्यक्त करत बिले प्रलंबित ठेवू नका असे आदेश काढले. जिल्हापरिषदेच्या सर्व विभागाकडील वर्ग 3 व वर्ग 4 मधील कर्मचाऱ्यांची वैद्यकीय देयके तपासणीची जबाबदारी जिल्हा परिषद आरोग्य विभागात कार्यरत आरोग्य सेवकाकडे देण्यात आली होती. संबंधित कर्मचार्याने मोठ्या प्रमाणावर वैद्यकीय देयके प्रलंबित ठेवल्याची बाब तसेच वैद्यकीय देयक वॉच नोंदवही ठेवली नव्हती. त्यांच्या कार्यासनाचे कपाट सहा गठ्ठे अस्ताव्यस्त स्वरुपात ठेवलेले होते. विभागाकडे किती देयक प्राप्त झाली, त्यापैकी किती देयकांचा निपटारा झाला आणि किती प्रलंबित आहेत, याचाही ताळमेळ संबंधित कर्मचार्याला देता आला नाही. तसेच अनेक कर्मचार्यांची वैद्यकीय देयकेही प्रलंबित राहिल्याचे निदर्शनास आले होते