माजी आमदार राजन तेली यांच्या हस्ते उद्धाटन
सहयोग ग्रामविकास मंडळ, गरडचे आयोजन
सावंतवाडी । प्रतिनिधी : सहयोग ग्रामविकास मंडळ, गरड माजगाव व तालुक्यातील महाविद्यालये आणि माध्यमिक विद्यालयांच्या सहकार्याने मळगाव इंग्लिश स्कुल येथे ‘शाळा कॅालेज ते शेतकरी बांध’ उपक्रम घेण्यात आला. या उपक्रमाचे उद्धाटन माजी आमदार तथा भाजपा जिल्हाध्यक्ष राजन तेली यांच्या हस्ते करण्यात आले.
यावेळी सावंतवाडी संस्थानचे युवराज लखमराजे भोंसले, सहयोग ग्रामविकास मंडळाचे अध्यक्ष प्रा. दिलीप गोडकर, मळगांव सरपंच स्नेहल जामदार, माजगांव सरपंच अर्चना सावंत, माजी सभापती राजू परब, मळगाव उपसरपंच हनुमंत पेडणेकर, अण्णा देसाई, श्री बिर्जे, माजी सभापती गुरुनाथ पेडणेकर, मळगांव हायस्कूल चे मुख्याध्यापक श्री. फाले, कृषी अधिकारी प्रशांत चव्हाण, प्रवीण मांजरेकर आदी उपस्थित होते.
शेती पासून दूर जाणारा युवा वर्ग शेतीकडे वळावा, त्यांना शेतीविषयक आवड निर्माण व्हावी, शेतीतील नवीन तंत्रज्ञानाबद्दल माहिती व्हावी, शेतकऱ्यांना शेतीच्या कामात मदत व्हावी आणि शाळा – महाविद्यालयाना
समाजोपयोगी उपक्रमात सहभागी होता यावे, या उद्देशाने हा उपक्रम राबविण्याचे ठरविले आहे. या उपक्रमाअंतर्गत पाच ते आठ विद्यार्थ्यांचा गट शेतकऱ्यांच्या शेतात जाऊन त्यांच्या गरजेप्रमाणे शेतीविषयक कामात त्यांना मदत करणार आहे. तसेच गरज भासल्यास तज्ज्ञ मार्गदर्शक शेतकऱ्यांना व मुलांना शेतीविषयक मार्गदर्शन करणार आहेत,अशी माहिती यावेळी मंडळाचे अध्यक्ष प्रा. दिलीप गोडकर यांनी दिली.
या उपक्रमामध्ये सावंतवाडी तालुक्यातील,श्री पंचम खेमराज महाविद्यालय ,भोंसले फार्मसी कॉलेज ,भोंसाले पॉलीटेकनिक कॉलेज ,राणी पार्वती देवी हायस्कूल आणि जुनिअर कॉलेज, .जे बी नाईक कॉलेज, कळसुळकर हायस्कूल आणि जुनिअर कॉलेज, श्री रवळनाथ विद्यामंदिर ओटवणे, भाईसाहेब माध्यमिक विद्यालय माजगाव , .नूतन माध्यमिक विद्यालय इन्सुलि,मळगाव इंग्लिश स्कूल मळगाव , कोळगाव माध्यमिक विद्यालय कोळगाव ,व्ही .पी .कॉलेज ऑफ फार्मसी माडखोल ,माडखोल विद्यालय माडखोल ,श्री जनता विद्यालय आणि जुनिअर कॉलेज तळवडे अशा चौदा शाळा कॉलेज आणि माध्यमिक विद्यालयामधून सुमारे चारशे ते पाचशे विद्यार्थी विद्यार्थीनी सहभागी होणार असल्याचेही त्यांनी यावेळी स्पष्ट केले.
यावेळी प्रत्यक्ष शेतात जाऊन प्रात्यक्षिक करण्यात आले. तसेच या कार्यक्रमात विद्यार्थ्यांना रेन कोट व छत्र्यांचे वाटप करण्यात आले. यावेळी स्थानिक शेतकरी तसेच विद्यार्थी विद्यार्थिनी मोठ्या संख्येने उपस्थित होत्या.