१० जुलै १९५७ हा भारतातील मत्स्य उत्पादकांसाठी एक संस्मरणीय दिवस आहे. या दिवशी शास्त्रज्ञ डॉ. हिरालाल चौधरी यांनी डॉ. अलीकुन्ही यांच्या सहकार्याने भारतीय प्रमुख कार्प माशांच्या प्रेरित प्रजननात पहिले यश संपादन केले होते. दिनांक १० जुलै या दिवसाचे महत्व लक्षात घेऊन भारत सरकारने २००१ मध्ये १० जुलै हा ‘राष्ट्रीय मत्स्यशेतकरी दिन’ म्हणून घोषित केला आहे. ‘राष्ट्रीय मत्स्यशेतकरी दिवस’ संपूर्ण भारतभर मोठ्या उत्साहात साजरा करण्यात येत असून यंदाचे हे २३ वे वर्ष आहे. या वर्षी देखील हा दिवस मोठ्या उत्साहात ‘डॉ. बाळासाहेब सावंत कोकण कृषी विद्यापीठ, दापोली’ अंतर्गत झाडगांव, रत्नागिरी येथे असलेले ‘सागरी जीवशास्त्रीय संशोधन केंद्र’ मार्फत साजरा करण्यात आला. राष्ट्रीय मत्स्य शेतकरी दिनाचे औचित्य साधुन सागरी जीवशास्त्रीय संशोधन केंद्र, रत्नागिरी यांच्या मार्गदर्शन खाली मत्स्यशेती संबंधित व्यवसाय सुरु केले आहेत अशा शेतकऱ्यांच्या ठिकाणी जावून प्रातिनाधिक स्वरूपामध्ये मत्स्य शेतकऱ्यांचा सत्कार केला जातो.
फणसोप येथील श्री. केतन भोंगले आणि त्यांची पत्नी सौ. सविता भोंगले हे गेले कित्येक वर्ष शोभिवंत माशांचे बिजोत्पादन आणि संवर्धन या व्यवसायामध्ये रत्नागिरी येथे कार्यरत आहेत. सौ. सविता भोंगले यांनी सागरी जीवशास्त्रीय संशोधन केंद्र, झाडगाव, रत्नागिरी येथे सन २०१७ मध्ये प्रशिक्षण घेतले आहे. सध्या त्यांनी फणसोप येथे नव्याने शोभिवंत मासे संगोपन आणि बिजोत्पादन व्यवसाय करत आहेत. दिनांक १० जुलै २०२३ ‘राष्ट्रीय मत्स्य शेतकरी दिनाचे’ औचित्य साधुन ‘सागरी जीवशास्त्रीय संशोधन केंद्र’ रत्नागिरी तर्फे श्री. केतन आणि सविता भोंगले या उभयतांचे प्रत्यक्ष फणसोप येथील मत्स्य केंद्रावर जावून त्यांना प्रोत्साहन देण्याकरिता सागरी जीवशास्त्रीय संशोधन केंद्र, झाडगांव, रत्नागिरीचे वरीष्ठ वैज्ञानिक अधिकारी आणि प्रमुख डॉ. प्रकाश शिनगारे यांचे हस्ते त्यांना ‘सन्मानचिन्ह’ आणि ‘पुष्पगुच्छ’ देवून सत्कार करण्यात आला. या वेळी संशोधन केंद्राचे सहाय्यक संशोधन अधिकारी प्रा. नरेंद्र चोगले, प्रा. सचिन साटम, प्रा. कल्पेश शिंदे, अभिरक्षक डॉ. संतोष मेतर, वरिष्ठ संशोधन सहाय्यक व्ही.आर. सदावर्ते आणि श्री. अण्णासाहेब कारखिले, वाहनचालक उपस्थित होते.सदर कार्यक्रम यशस्वी पार पाडण्याकरीता डॉ. बाळासाहेब सावंत कोंकण कृषि विद्यापीठ, दापोलीचे आदरणीय कुलगुरू डॉ. संजय भावे, विस्तार शिक्षण संचालक डॉ. प्रमोद सावंत आणि संशोधन संचालक डॉ. यशवंत खांदेतोड यांचे विशेष मार्गदर्शन लाभले. सदर कार्यक्रमाचे समन्वयाचे काम प्राध्यापक डॉ. ए.यु. पागरकर आणि श्री. एस.बी. साटम यांनी पार पडले