पर्यटन व्यावसायिक महासंघ अध्यक्ष विष्णू मोंडकर यांची माहिती
मालवण | प्रतिनिधी : निवती किल्ला तसेच समुद्रातील निवती दीपगृह आणि समुद्राखाली असलेले विविध प्रकारचे मासे, कोरल यात जागतिक पर्यटन खेचून आणण्याची क्षमता आहे. हा भाग पर्यटन दृष्ट्या विकसित करण्यासाठी पर्यटन व्यावसायिक महासंघ प्रयत्नशील असून निवती किल्ला परिसर तसेच निवती दीपगृह पर्यटकांना खुले करण्यासाठी तसेच निवती दीपगृह परिसरात जलपर्यटनसाठी पाणबुडी सबमरीन प्रकल्प लवकरात लवकर सुरु करण्यासाठी परिपूर्ण प्रस्ताव पालकमंत्री रवींद्र चव्हाण यांच्याकडे पर्यटन व्यावसायिक महासंघा तर्फे सादर करण्यात येणार आहे. अशी माहिती पर्यटन व्यावसायिक महासंघ अध्यक्ष विष्णू मोंडकर यांनी दिली.
महाराष्ट्रातील सिंधुदुर्ग जिल्ह्यातील सबमरीन प्रकल्प गुजरात राज्यात ही बातमी आणि यावर नकारात्मक चर्चा करणे दुर्देवी आहे. या प्रकल्पासाठी लागणारे पैसे पर्यटन विभागाकडे उपलब्ध आहेत. वास्तविक जिल्ह्यात पर्यटन क्षेत्र वाढवण्यासाठी स्थानिकामधील समन्वय महत्वाचा असून सर्व राजकीय व सामाजिक संघटनांनी एकत्र येणे ही काळाची गरज आहे. ज्या पद्धतीने राजकोट किल्ला तसेच छत्रपती शिवाजी महाराज यांचा पुतळा, श्री क्षेत्र मोरयाचा धोंडा शासकीय पूजा सारख्या ऐतिहासिक पर्यटन वाढीसाठी धाडसी निर्णय घेतलेल्या राज्याचे सार्वजनिक बांधकाम मंत्री तथा सिंधुदुर्ग पालकमंत्री रविंद्र चव्हाण यांच्या माध्यमातून सिंधुदुर्ग जिल्हा खऱ्या अर्थाने पर्यटन जिल्हा म्हणून उभारी घेत असल्याने त्यांच्या नेतृत्वात अश्या प्रकारचे पर्यटन पूरक प्रकल्प जिल्ह्यातुन बाहेर न जाण्याचा पर्यटन व्यावसायिक महासंघास पूर्ण विश्वास आहे.
वास्तविक सिंधुदुर्ग जिल्हा पर्यटन जिल्हा घोषित होऊन 25 वर्ष झाली. तारकर्ली, देवबाग, भोगवे, कुणकेश्वर, अन्य काही किनारपट्टीसह जिल्ह्यातील 121 की.मी किनारपट्टीवर पर्यटन पूरक व्यवसाय निर्माण होत आहेत. तसे झाल्यास स्थानिकांना रोजगाराच्या संधी अधिक उपलब्ध होणार आहेत.
वेंगुर्ला तालुक्यात निवती भाग पर्यटन दृष्ट्या जागतिक पातळीवर येण्याची ताकद या भागात असलेल्या निवती किल्ला तसेच येथूनच समुद्रात उभ्या असलेले निवती दीपगृह आणि या परिसरात समुद्राखाली असलेले विविध प्रकारचे मासे, कोरल यात जागतिक पर्यटनाची क्षमता आहे. हा भाग पर्यटन दृष्ट्या विकसित करण्यासाठी पर्यटन व्यावसायिक महासंघ प्रयत्नशील असून निवती किल्ला परिसर तसेच निवती दीपगृह पर्यटनासाठी पर्यटकांना खुले करण्यासाठी तसेच निवती दीपगृह परिसरातील जलपर्यटनसाठी पाणबुडी सबमरीन प्रकल्प लवकरात लवकर सुरु करण्यासाठी परिपूर्ण प्रस्ताव जिल्ह्याचे पालकमंत्री रवींद्र चव्हाण यांच्याकडे पर्यटन व्यावसायिक महासंघा तर्फे सादर करण्यात येणार आहे. यासाठी स्थानिक मच्छिमार व पर्यटन व्यावसायिकांशी सकारात्मक चर्चा होऊन या भागात संयुक्त रित्या प्रकल्प उभा झाल्यास वेंगुर्ला तालुक्यासोबत सिंधुदुर्ग जिल्हा जागतिक पर्यटन नकाशा वर येण्यास मदत होईल. पाणबुडी प्रकल्पासाठी राज्याचे शिक्षणमंत्री दीपक केसरकर प्रयत्नशील असून हा पाणबुडी प्रकल्प होणारच आहे.
जिल्ह्यातील सर्व गडकिल्ल्याचे शासकीय अधिकृत माहिती असलेले शासकीय पुस्तक बनविण्याचे आदेश पालकमंत्री यांनी स्थानिक जिल्हाप्रशासनास दिले असून प्रशासकीय पातळीवर यावर काम चालू आहे. निवती किल्ल्यावर पर्यटन दृष्ट्या डेव्हलपमेंटसाठी पालकमंत्री यांनी सकारात्मक प्रतिसाद दाखविला असून निवती दीपगृह या ठिकाणी पर्यटकांना जाण्यासाठी आवश्यक त्या सुविधा उपलब्ध करून देऊन निवती भाग पर्यटन दृष्ट्या विकसित करण्याचा पर्यटन व्यावसायिक महासंघाचा मानस असल्याची माहिती विष्णू मोंडकर अध्यक्ष पर्यटन व्यावसायिक महासंघ यांनी दिली.
