‘रिसेंट ट्रेंड्स इन टुरिझम’ दोन दिवसीय राष्ट्रीय चर्चासत्राचे दिमाखदार उद्घाटन
मालवण | प्रतिनिधी : स. का. पाटील सिंधुदुर्ग महाविद्यालय मालवण भूगोल विभाग, अंतर्गत गुणवत्ता हमी कक्ष व कोकण जिओगफर असोसिएशन ऑफ इंडिया यांच्या संयुक्त विद्यमाने पर्यटनातील नवप्रवाह अर्थात रिसेंट ट्रेंड्स इन टुरिझम या विषयावर दोन दिवसीय राष्ट्रीय चर्चासत्राचे आयोजन सिंधुदुर्ग महाविद्यालयात करण्यात आले आहे. त्याचा शुभारंभ उपस्थित मान्यवरांच्या उपस्थितीत गुरुवारी संपन्न झाला.
यावेळी प्रमुख उपस्थिती नॅक बेंगलोरचे सह सल्लागार डॉ. डी. के. कांबळे, मालवणचे तहसीलदार श्रीधर पाटील, कृ. सी. देसाई शिक्षण मंडळाचे कार्याध्यक्ष श्रीपाद पंतवालावलकर, सचिव चंद्रशेखर कुशे, स. का. पाटील सिंधुदुर्ग महाविद्यालयाचे प्राचार्य डॉ. शिवराम ठाकूर, डॉ. शशिकांत झाटये, डॉ. राजाराम पाटील, डॉ. आर. एन. काटकर व अन्य प्राध्यापक व मान्यवर उपस्थित होते.
सध्याचे युग हे स्पर्धात्मक युग आहे. जगभरात शैक्षणिक दृष्टोकानातून विविध प्रयोग होत आहेत. भारतातही शैक्षणिकदृष्ट्या नवनवीन उपक्रम राबविले जात आहेत. गुणवत्तावान विद्यार्थी घडविण्यासाठी विद्यार्थ्यांमध्ये संशोधनवृत्ती वाढवणे गरजेचे आहे. असे मत नॅक बँगलोरचे सह सल्लागार डॉ. डी. के. कांबळे यांनी बोलताना केले.
डॉ. शशिकांत झाटये म्हणाले, जगात ज्या गोष्टी नाही त्या गोष्टी भारतात आहे. परंतु त्यांचा योग्य पद्धतीने प्रसार होत नाही. त्यामुळे भारतातील प्रसिद्ध गोष्टींचा प्रसार व्हावा त्यासाठी शासनाने प्रयत्न करावेत. तहसीलदार श्रीधर पाटील म्हणाले, एमपीएसी, युपीएससी या स्पर्धात्मक परीक्षांसाठी विविध पुस्तकांची आवश्यकता असते. सध्या एमपीएससी परीक्षेचे स्वरूप बदलले आहे. त्यामुळे विद्यार्थ्यांसाठी भूगोल या विषयाच्या अनुषंगाने कोकणातील प्राध्यापक वर्गाने पुस्तक तयार करावे. ज्याचा उपयोग विद्यार्थी वर्गासाठी होईल. असे सांगितले. संस्थेचे कार्याध्यक्ष बाळासाहेब पंतवालावलकर म्हणाले, शिक्षण क्षेत्रात नवनवीन बदल होत आहेत. या बदलांच्या पार्श्वभूमीवर प्राध्यापक व विद्यार्थी वर्गाने अपडेट राहणे गरजेचे आहे.
यावेळी नॅक बँगलोरचे सह सल्लागार डॉ. डी. के. कांबळे, तहसीलदार श्रीधर पाटील यांच्यासह डॉ. सनलकुमार (केरळ), डॉ. समीर बुटाला (पोलादपूर), डॉ. दिपाली गडकरी (मुंबई), डॉ. हेमंत पेडणेकर (मुंबई), डॉ. एस. बी. गायकवाड (मिरज), डॉ. नंदकुमार सावंत (गोवा), डॉ. दिपक कोल्हापुरे ( कर्नाटक), डॉ. सुशील दलाल (हरियाणा) आदि संशोधकांना सन्मानित करण्यात आले.
प्राचार्य डॉ शिवराम ठाकूर ‘जिवनगौरव ने सन्मानित
सिंधुदुर्ग कॉलेजचे उपक्रमशील प्राचार्य व राष्ट्रीय चर्चासत्राचे यशस्वी आयोजन करणारे प्राचार्य डॉ शिवराम ठाकूर यांना कोकण जिओगफर असोसिएशन ऑफ इंडियाच्या वतीने ‘जीवनगौरव’ सन्मान देऊन तहसीलदार श्रीधर पाटील यांच्या हस्ते सन्मानित करण्यात आले. तर सामाजिक क्षेत्रात सेवाभावी वृत्तीने नेहमीच कार्यरत असणारा महाविद्यालयाचा विद्यार्थी प्रितम गावडे यांनाही विशेष सन्मानित करण्यात आले.
कार्यक्रमाचे सुत्रसंचालन प्रा. बी. एच. चौगुले यांनी केले तर आभार प्रा. सुमेधा नाईक यांनी मानले. नऊ राज्यातून अभ्यासक व संशोधक या चर्चासत्रात सहभागी झाले होते. आज शुक्रवारी या चर्चासत्राची सांगता होणार आहे. राष्ट्रीय चर्चासत्राचे सिंधुदुर्ग महाविद्यालयात आयोजन हा सोनेरी क्षण असल्याचे प्राचार्य डॉ. शिवराम ठाकूर यांनी सांगितले.
