माजी आमदार ऍड सौ. खलिफे यांच्या प्रयत्नाने राजापूर ते धारतळे मुसाकाझी रस्त्याचे काम मार्गी

राजापूर | प्रतिनिधी : माजी आमदार एड. सौ.हुस्नबानू खलिफे यांच्या प्रयत्नाने राजापूर तालुक्यातील राजापूर ते धारतळे मुसाकाझी रस्त्याच्या डांबरीकरणाच्या कामाला मंजूरी मिळाली असून या कामाची निविदा प्रकिया पूर्ण होवून पत्यक्ष कामालाही सुरूवात झाली आहे. तशी माहीती एड सौ. खलिफे यांनी दिली आहे. या रस्त्याचे काम मार्गी लागल्यामुळे वाहनचालक व ग्रामस्थांतून समाधान व्यक्त होत आहे.

राजापूर ते धारतळे व पुढे धारतळे ते गावखडी दरम्यानच्या सागरी महामार्गावर ठिकठिकाणी खड्डे पडल्याने या मार्गावरून प्रवास करणे वाहन चालकांसाठी डोकेदुखी ठरत आहे. धारतळे ते गावखडी रस्त्याच्या दुरूस्तीसाठी गतवर्षीच वर्क ऑडर देण्यात आली आहे. मात्र अद्यापही या कामाला सुरूवात झालेली नाही. त्यामुळे या मार्गावरून पवास करणाऱया ग्रामस्थांसह वाहन चालकांमध्ये संतापाची भावना आहे. काही दिवसांपूर्वी माजी नगराध्यक्ष एड .जमीर खलिफे यांच्या नेतृत्वाखाली ग्रामस्थांनी बांधकाम विभागावर धडक देत याबाबत जाबही विचारला होता. त्यावेळी 15 मार्चपासून कामाला सुरूवात होईल असे आश्वासन देण्यात आले होते. मात्र अद्यापही कामाला सुरूवात झालेली नाही.

तर दुसरीकडे राजापूर ते धारतळे मुसाकाझी या रस्त्याच्या कामाला मंजुरी मिळाली असून नुकतीच या कामाची निविदा प्रकिया पूर्ण होवून तात्काळ कामाला सुरूवातही करण्यात आली आहे. माजी आमदार सौ.हुस्नबानू खलिफे यांनी राजापूर ते धारतळे मुसाकाझी या रस्त्याच्या डांबरीकरणाच्या कामासाठी निधी मिळावा याकरीता पाठपुरावा केला होता. त्याला यश येताना तत्कालीन सार्वजनिक बांधकाम मंत्री अशोक चव्हाण यांनी रस्त्याच्या कामाला मंजुरी दिली होती. आता हे काम मार्गी लागत असल्याने प्रवासी व वाहन चालकांतून समाधान व्यक्त होत आहे.