संस्थान आचरे गावात रामजन्मोत्सव नेत्रदीपक
आचरा | अर्जुन बापर्डेकर : ऐन मध्यान्ही च्या समयी रामदासी बुवांचे किर्तन रंगात आले होते.सर्वांची लगबग वाढली होती. आणि घटीका भरली. जय जय रघुवीर समर्थ ची आरोळी आसमंतात उसळली. गुलाल उधळला गेला. ढोलताशा सनईचा एकच स्वर निनादला राम जन्मला ग सखे राम जन्मलागुढीपाडव्यापासून सुरू झालेल्या संस्थान आचरे गावच्या रामजन्मोत्सवातील हा अच्युतम क्षण याची देही याची डोळा अनुभवण्यासाठी रामेश्वर मंदिर परीसर भाविकांनी भरुन गेला होता. रामजन्मोत्सवानंतर गुलाल उधळत,ढोल ताशा, बँड पथकाच्या वादनात बाळ रामाच्या गोजिरवाण्या मुर्तीची सरंजामासहीत रामेश्वर मंदिराला फेरी मारली गेली. यावेळी वाद्यांचे मंगलमय स्वर आणि रामजन्मोत्सवाचा महिमा गीतांचे मंगल स्वर संस्थानच्या प्रांगणात निनादत होते.
इनामदार श्री देव रामेश्वर संस्थानच्या या संस्थानी थाटाच्या सोहळ्यास गुढीपाडव्यापासून सुरुवात होते. रघुवीर आरती गवई गाणे, संध्याकाळचे मंगल स्नान माखन,,दरबारी गायन,रात्रौ पालखीत्सोव,किर्तन अशा दैनंदिन कार्यक्रमात हा सोहळा संपन्न होत असतो. रामनवमिच्या पुर्वरसंध्येला राम मराठे यांचे नातू भाग्येश मराठे यांनी तर रामनवमी दिवशी सायंकाळी निराली कार्तिक यांनी आपल्या गायकिने उपस्थितांना मंत्रमुग्ध केले.
रामजन्मोत्सवानिमित्त महाप्रसाद
या सोहळ्याला येणाऱ्या भाविकांच्या सोईसाठी देवस्थान समिती,मानकरी, ग्रामस्थांनी रात्रभर झटून महाप्रसादाची व्यवस्था केली होती. याचा लाभ घेण्यासाठी भाविकांच्या रांगा लागल्या होत्या. देवस्थान समिती ,मानकरी, ग्रामस्थ,यांच्या नियोजनातून हजारो भाविकांनी महाप्रसादाचा लाभ घेतला.
