निवडणूक मिरवणूक प्रकरणी 7जणांची निर्दोष मुक्तता

7 persons acquitted in election procession case

रत्नागिरी | प्रतिनिधी : पोटनिवडणुकीच्यावेळी विनापरवाना मिरवणूक काढल्याप्रकरणी प्रथमवर्ग न्यायदंडाधिकार्‍यांनी दिलेल्या शिक्षेविरोधात करण्यात आलेले अपिल अतिरिक्त सत्र न्यायालयाने मंजूर करीत निर्दोष मुक्तता केली आणि दंडाची रक्कम परत करण्याचे आदेश दिले. रत्नागिरी नगर पालिकेच्या पोटनिवडणुकीत विजय मिळाल्याबद्दल 3 नोव्हेंबर 2015 सायंकाळी राजिवडा भागात मिरवणूक काढण्यात आली होती. रुबिना मालवणकर व सईद पावसकर हे विजयी उमेदवार उघड्या जीपमध्ये या मिरवणुकीत सहभागी झाले होते. रस्त्यात वाहतुकीला अडथळा निर्माण होईल अशा पध्दतीने मिरवणूक काढल्याप्रकरणी सहाय्यक उपनिरीक्षक आदिनाथ माने यांनी तक्रार दिली होती. याप्रकरणी एकूण 19 जणांवर गुन्हा दाखल करण्यात आला होता.या गुन्ह्यात प्रथमवर्ग न्यायदंडाधिकार्‍यांनी दोन हजार रुपये दंडाची शिक्षा ठोठावली होती. याविरोधात रुबिना मालवणकर, सईद पावसकर, शब्बीर भाटकर, सैफअली पावसकर, निलेश भोसले, स्वप्नील शिंदे, सुरज गेहलोत यांनी सत्र न्यायालयात अपिल दाखल केले होते. सातजणांच्यावतीने अ‍ॅड. सचिन थरवळ यांनी बाजू मांडली. अतिरिक्त सत्र न्यायाधीश ला. द. बिले यांनी प्रथमवर्ग न्यायदंडाधिकार्‍यांनी दिलेली शिक्षा रद्द करताना निर्दोष मुक्त केले आणि दंडाची रक्कम परत करण्याचे आदेश दिले.