आंबा, काजू पिकांना फटका : जनजीवन विस्कळीत
सावंतवाडी । प्रतिनिधी : सावंतवाडी तालुक्यात गेल्या काही दिवसांपासून सुरू असलेल्या पूर्वमोसमी पावसाने अक्षरश: हाहाकार माजवला आहे. वादळी वाऱ्यासह कोसळणाऱ्या मुसळधार पावसामुळे आंबा आणि काजू पिकांचे मोठ्या प्रमाणावर नुकसान झाले असून शेतकऱ्यांचे मोठे आर्थिक नुकसान झाले आहे. केवळ शेतीच नव्हे, तर बाजारपेठ, बांधकाम क्षेत्र, आणि ग्रामीण भागातील दैनंदिन व्यवहारांवरही या पावसाचा विपरीत परिणाम झाला आहे.
आंबा आणि काजू उत्पादकांना मोठा फटका:
या अवकाळी पावसाचा सर्वाधिक फटका आंबा आणि काजू उत्पादकांना बसला आहे. काढणीला आलेल्या आंब्याचा दर्जा पावसामुळे घसरला असून, अनेक ठिकाणी आंब्याचे पीक गळून पडले आहे. यामुळे बाजारपेठेतील आंबा विक्री करणाऱ्या व्यापाऱ्यांचेही मोठे नुकसान झाले आहे. काजू पिकालाही या पावसाने झोडपले असून, उत्पादनात घट होण्याची भीती व्यक्त होत आहे.
शेतकऱ्यांची चिंता वाढली:
शेती पूर्वमशागतीची कामे पावसाने पूर्णपणे थांबवली आहेत. पेरणीपूर्व कामांमध्ये अडथळे निर्माण झाल्याने शेतकऱ्यांची चिंता वाढली आहे. ग्रामीण भागात घर शाकारणीची कामे तसेच पावसाळ्यासाठी आवश्यक बेगमीची कामे अपूर्ण राहिली आहेत. गुरांसाठी साठवलेले गवत भिजल्याने पशुपालकांचेही नुकसान झाले आहे.
बांधकाम क्षेत्रातील कामे ठप्प:
अचानक पावसाने जोर धरल्याने रस्त्याची तसेच बांधकाम क्षेत्रातील कामे रखडली आहेत. पावसामुळे कामांमध्ये व्यत्यय येत असल्याने नियोजित वेळेत कामे पूर्ण करणे कठीण झाले आहे.
ग्रामीण जनजीवनावर परिणाम:
ग्रामीण भागात लाकूडफाटा भिजल्याने चुली पेटवणेही कठीण झाले आहे. लग्न आणि इतर सार्वजनिक कार्यक्रमांमध्येही या पावसाने विघ्न निर्माण केले असून, अनेकांना कार्यक्रम रद्द करावे लागले आहेत किंवा पुढे ढकलावे लागले आहेत.
या पूर्वमोसमी पावसाने तालुक्यात सर्वच स्तरावर मोठे नुकसान केले असून, प्रशासनाने तात्काळ पंचनामे करून शेतकऱ्यांना आणि बाधित घटकांना आर्थिक मदत द्यावी, अशी मागणी जोर धरू लागली आहे.
