खेड (प्रतिनिधी):
रत्नागिरी जिल्ह्यातील खेड तालुक्यात बेकायदेशीररीत्या बैलांची वाहतूक करणाऱ्या एका टोळीचा पोलिसांनी पर्दाफाश केला आहे. आंबडस बस स्थानकाजवळ रविवारी पहाटे करण्यात आलेल्या या कारवाईत पोलिसांनी ४ लाख ९० हजार रुपयांचा मुद्देमाल जप्त केला असून तिघांविरुद्ध गुन्हा दाखल केला आहे.
मिळालेल्या माहितीनुसार, २९ डिसेंबर २०२५ रोजी पहाटे २:४५ च्या सुमारास आंबडस बस स्टॉपजवळ ही कारवाई करण्यात आली. संशयित आरोपी बोलेरो पिकअप (क्र. MH 50 N 5476) मधून कोणत्याही परवान्याशिवाय चार लहान-मोठ्या बैलांची अत्यंत क्रूरपणे वाहतूक करत होते. बैलांना आखूड दोरीने दाटीवाटीने बांधून त्यांना कत्तलीसाठी नेले जात असल्याचे प्राथमिक तपासात समोर आले आहे.
याप्रकरणी पोलिसांनी संजू राजू साळुंखे (३१ वर्षे), रोहन अंकुश साळुंखे (२१ वर्षे) दोन्ही रा. हिंगणगाव बुद्रुक, जि. सांगली आणि संजय गंगाराम चव्हाण (३४ वर्षे) रा. आंबडस, जि. रत्नागिरी या तिघांना ताब्यात घेतले आहे. या कारवाईत ४ लाख रुपये किमतीची बोलेरो गाडी आणि ९० हजार रुपये किमतीचे चार बैल असा एकूण ४,९०,००० रुपयांचा मुद्देमाल जप्त करण्यात आला आहे.
खेड पोलीस ठाण्याचे पोलीस कॉन्स्टेबल अशोक विठ्ठल मुंडे यांनी या प्रकरणी फिर्याद दिली असून, पोलिसांनी विविध कलमान्वये गुन्हा दाखल केला आहे. खेड पोलीस या प्रकरणाचा अधिक तपास करत आहेत.
