डिजिटल अटकेच्या नावाखाली ८२ वर्षीय ज्येष्ठाची १०.७५ कोटींची फसवणूक
बोगस ट्राय, सीबीआय व न्यायाधीश बनून सायबर ठगांचा थरार
पुणे सायबर पोलिसांकडून गुन्हा दाखल, तपास सुरू
पुण्यात डिजिटल अटकेच्या नावाखाली झालेल्या एका मोठ्या सायबर फसवणुकीने खळबळ उडाली आहे. भांडारकर रोड परिसरातील ८२ वर्षीय ज्येष्ठ नागरिकाची तब्बल १०.७५ कोटी रुपयांची फसवणूक करण्यात आली. ट्राय, सीबीआय आणि न्यायालयीन अधिकाऱ्यांची तोतयागिरी करत सायबर भामट्यांनी ही कारवाई केली. वृद्ध व्यक्तीला मानसिक दबावाखाली ठेवत त्यांची सर्व बचत आणि एफडी वेगवेगळ्या खात्यांमध्ये ट्रान्सफर करवून घेण्यात आली. प्रकरण उघडकीस आल्यानंतर पुणे सायबर पोलिसांनी गुन्हा दाखल केला आहे.
पुणे : भांडारकर रोड परिसरात राहणाऱ्या ८२ वर्षीय ज्येष्ठ नागरिकाला २३ ते ३१ जानेवारी दरम्यान डिजिटल अटक फसवणुकीत १०.७५ कोटी रुपयांचा आर्थिक फटका बसला आहे. पीडित व्यक्ती मूळ उत्तर भारतातील असून सुमारे १५ वर्षांपूर्वी पुण्यात स्थायिक झाले होते.
पीडिताने सेवानिवृत्तीनंतर जमवलेली सर्व बचत, मुदत ठेवी (FDs) तसेच अमेरिकेत स्थायिक असलेल्या दोन मुलांनी पाठवलेले पैसे या फसवणुकीत गमावले. पुणे सायबर पोलिसांच्या इन्स्पेक्टर संगीता देवकाटे यांनी दिलेल्या माहितीनुसार, पीडित व्यक्ती एकटीच राहते, तर त्यांची मुलगी पुण्यातच तिच्या सासरी राहते.
एफआयआरनुसार, ट्राय, सीबीआय आणि न्यायालयीन अधिकारी असल्याची बतावणी करणाऱ्या भामट्यांनी पीडिताला सांगितले की, त्याच्या आधार कार्डचा मनी लाँड्रिंग आणि इतर बेकायदेशीर व्यवहारांमध्ये गैरवापर झाला आहे. त्यामुळे त्याला डिजिटल अटक करण्यात आल्याचे सांगून ऑनलाइन चौकशीसाठी न्यायालयासमोर हजर राहण्याचा दबाव टाकण्यात आला.
सायबर भामट्यांनी पीडिताला प्रकरण कोणालाही सांगू नये, असा इशाराही दिला. २३ जानेवारी रोजी बोगस ट्राय अधिकाऱ्याच्या फोननंतर कॉल एका बनावट सीबीआय अधिकाऱ्याकडे वळवण्यात आला. त्यानंतर पीडिताला सोशल मीडिया अॅपद्वारे व्हिडिओ कॉलवर राहण्यास भाग पाडण्यात आले.
या तोतया सीबीआय अधिकाऱ्याने पीडिताला ७ ते ९ वर्षांच्या तुरुंगवासाची धमकी दिली आणि बँक खात्यांचे तपशील, आधार कार्ड, पॅन कार्ड ‘व्हेरिफिकेशन’च्या नावाखाली घेतले. पुढे बोगस न्यायाधीशासमोर ऑनलाइन हजर करण्यात आले आणि कुटुंबीयांनाही अटक करण्याची धमकी देण्यात आली.
त्यानंतर या बनावट न्यायाधीशाने केस बंद करण्यासाठी पीडिताची संपूर्ण बचत व एफडीतील रक्कम सात वेगवेगळ्या बँक खात्यांमध्ये ट्रान्सफर करण्याचे आदेश दिले. पीडिताने १०.७५ कोटी रुपये ट्रान्सफर केल्यानंतर त्याला मोकळे सोडण्यात आले.
यानंतर पीडिताने आपल्या मुलीशी संपर्क साधला. फसवणूक झाल्याचे लक्षात येताच मुलीने पुणे सायबर पोलिसांकडे तक्रार दाखल केली. या तक्रारीवरून सायबर फसवणुकीचा गुन्हा दाखल करण्यात आला असून तपास सुरू असल्याची माहिती पोलिसांनी दिली.
