किल्ले सिंधुदुर्ग येथील मंदिर सुशोभिकरणासाठी ८८ लाखांचा निधी मंजूर
भाजपा नेते माजी खासदार निलेश राणे यांनी केली होती तत्कालीन पर्यटन मंत्री मंगलप्रभात लोढा व सार्वजनिक बांधकाम मंत्री रवींद्र चव्हाण यांच्याजवळ मागणी
नौसेना दिनानिमित्त किल्ले सिंधुदुर्ग परिसर सुशोभीकरण होणार
मालवण | प्रतिनिधी : ४ डिसेंबर रोजी नौसेना दिनानिमित्त देशाचे पंतप्रधान नरेंद्रजी मोदी हे सिंधुदुर्ग किल्ल्यावर येत असून त्या निमित्त विविध कार्यक्रमांचे आयोजन करण्यात आलं आहे. या पार्श्वभूमीवर मालवण किल्ला परिसर सुशोभित व्हावा यासाठी प्रादेशिक पर्यटन व सार्वजनिक बांधकाम अंतर्गत निधी उपलब्ध करून देण्याची मागणी भाजपा नेते निलेश राणे यांनी तत्कालीन पर्यटन मंत्री मंगलप्रभात लोढा व सिंधुदुर्ग जिल्ह्याचे पालकमंत्री व महाराष्ट्र राज्याचे सार्वजनिक बांधकाम मंत्री रवींद्र चव्हाण यांच्याजवळ केली होती. त्या अनुषंगाने सार्वजनिक बांधकाम विभागाच्या माध्यमातून विशेष दुरुस्ती अंतर्गत मालवण किल्ल्यावरील श्री देवी भवानी मंदिर परिसर सुशोभिकरणासाठी १४ लाख ५७ हजार, शिव मंदीर परिसर सुशोभिकरणासाठी १७ लाख ७६ हजार, महापुरुष मंदिर परिसर सुशोभिकरणासाठी १७ लाख ७१ हजार, नगारखाना इमारत परिसर सुशोभिकरणासाठी १८ लाख ४२ हजार तर किल्ल्यावरील धर्मशाळा दुरुस्ती करिता १९ लाख ७० हजार असा एकूण ८८ लाख १९ हजार एवढा निधी उपलब्ध झाला आहे. अशी माहिती मालवण तालुका भाजपच्या वतीने देण्यात आली आहे.
