संत ज्ञानेश्वरांच्या जयंती सप्तशताब्दी वर्षाच्या निमित्ताने सांस्कृतिक विभागाचा अभिनव उपक्रम
सावंतवाडी | प्रतिनिधी :
“आता विश्वात्मक देवे, येणे वाग्यज्ञे तोषावे…” या पसायदानाच्या शब्दांनी अवघ्या विश्वाचे कल्याण पाहणाऱ्या माउलींच्या विचारांचा सुगंध आजही जनमानसात तेवढ्याच ताजेपणाने दरवळत आहे. संत ज्ञानेश्वर महाराजांच्या ७५० व्या जयंती वर्षाचे औचित्य साधून सावंतवाडीच्या सांस्कृतिक पटलावर उमटलेला ‘मोगरा फुलला’ हा सांगीतिक आणि वैचारिक आविष्कार सुंदरवाडीतील अवघ्या रसिक मनाला भक्तीच्या वेगळ्या उंचीवर घेऊन गेला.
राज्य सरकारच्या सांस्कृतिक विभाग व सांस्कृतिक कार्य संचालनालयाच्या संकल्पनेतून संत ज्ञानेश्वरांचे सप्तशताब्दी वर्ष राज्यभर उत्साहात साजरे होत आहे. याच मालिकेतील एक महत्त्वपूर्ण कार्यक्रम बुधवारी सायंकाळी सावंतवाडी येथील बॅ. नाथ पै सभागृहात संपन्न झाला. या कार्यक्रमात ज्ञानेश्वरीचे तत्त्वज्ञान आणि माउलींचा जीवनप्रवास यांचा सुरेख संगम घडवून आणण्यात आला.
कार्यक्रमाचे सूत्रधार आणि प्रसिद्ध निरूपणकार गणेश शिंदे यांनी आपल्या ओघवत्या वाणीतून माउलींच्या जीवनातील आपेगाव ते आळंदीपर्यंतच्या प्रवासाचे भावस्पर्शी वर्णन केले. ते म्हणाले, “ज्ञानेश्वरी हा केवळ एक ग्रंथ नसून तो मानवी जीवनाचा मार्गदर्शक दीपस्तंभ आहे. आजच्या काळात जेव्हा जग अशांततेच्या छायेत आहे, तेव्हा पसायदानातून मिळणारा विश्वबंधुत्वाचा संदेश अधिकच समर्पक वाटतो. माउलींच्या विचारांची मशाल प्रत्येकाने आपल्या घराघरांत तेवत ठेवावी.”
*स्वरांजलीचा भक्तिमय सोहळा*
या कार्यक्रमाचे मुख्य आकर्षण ठरले ते गायिका सन्मिता धापटे-शिंदे आणि त्यांच्या सहकाऱ्यांनी सादर केलेले अभंगगायन. ‘अवघा रंग एक झाला’ आणि ‘बोलावा विठ्ठल, पाहावा विठ्ठल’ यांसारख्या रचनांनी सभागृहातील वातावरण भक्तीरसाने न्हाऊन निघाले. त्यांच्या सुरांनी उपस्थित श्रोत्यांना मंत्रमुग्ध केले आणि वारकरी संप्रदायाचा हा समृद्ध वारसा पुन्हा एकदा अधोरेखित झाला.
‘मोगरा फुलला’ हा कार्यक्रम म्हणजे केवळ एक सांगीतिक सादरीकरण नसून, तो संत साहित्यातील तत्त्वज्ञान तरुण पिढीपर्यंत पोहोचवणारा एक वैचारिक सोहळा ठरला आहे. संत ज्ञानेश्वरांच्या पवित्र स्मृतींना आणि विचारांना स्वरांजली अर्पण करणारा हा कलाविष्कार उपस्थितांच्या स्मरणात दीर्घकाळ राहणारा ठरला. सावंतवाडीकर रसिकांनी या बहारदार कार्यक्रमाला टाळ्यांच्या प्रतिसादात दाद दिली व हा कार्यक्रम एका वेगळ्याच उंचीवर नेऊन ठेवला.
