सावंतवाडी: गुरुपौर्णिमेच्या पावन पर्वावर सावंतवाडी तालुक्यातील माडखोल येथील प्रतिशिर्डी साई मंदिरात साई भक्तीचा अनुपम सोहळा संपन्न झाला. प्रतीशिर्डी, माडखोल येथील साईंची पालखी गुरुपौर्णिमेच्या पूर्वसंध्येला माजी मंत्री तथा आमदार दीपक केसरकर यांच्या निवासस्थानी दाखल झाली होती, जिथे केसरकर दांपत्याने साईंच्या पादुकांचे विधिवत पूजन केले.
त्यानंतर आज सकाळी, पूजन संपन्न झाल्यानंतर, ही पालखी पायी चालत प्रतिशिर्डी येथील साई मंदिरात दाखल झाली. या पालखी सोहळ्यात साई भक्तांचा उत्साह ओसंडून वाहत होता. पहाटे आमदार दीपक केसरकर यांच्या हस्ते माडखोल येथील साई मंदिरात अभिषेक आणि महाआरती संपन्न झाली, ज्याने या पवित्र दिनाची सुरुवात झाली.
केसरकर यांच्या निवासस्थानापासून वाजतगाजत निघालेल्या या पालखीत अभंग, भजने आणि टाळ-मृदंगाच्या निनादाने संपूर्ण वातावरण भक्तिमय झाले होते. साईभक्त टाळ-मृदंगाच्या गजरात आणि भजनांच्या तालावर तल्लीन होऊन नाचत होते, ज्यामुळे एक वेगळाच आध्यात्मिक अनुभव मिळत होता.
या मंगलमय सोहळ्यात शिवसेना शहरप्रमुख खेमराज उर्फ बाबू कुडतरकर, युवा रक्तदाता संघटनेचे अध्यक्ष देव्या सुर्याजी, दत्ता सावंत, श्री. मालवणकर, सुधीर धुमे, सुजित कोरगावकर, आबा केसरकर, शैलैश मेस्त्री, विश्वास घाग, गजानन नाटेकर, अर्चित पोकळे, प्रवीण चौगुले, पांडुरंग वर्दम यांच्यासह असंख्य साईभक्त मोठ्या संख्येने सहभागी झाले होते. या पालखी सोहळ्याने माडखोल परिसर साईमय झाला होता.
