पंजाब येथील बैठकीत निवड : क्रीडा क्षेत्रात मानाचे स्थान
सावंतवाडी । प्रतिनिधी:राष्ट्रीय रायफल असोसिएशन ऑफ इंडिया (NRAI) च्या कार्यकारिणीत सावंतवाडीचे सुपुत्र विक्रम ऊर्फ मेघशाम श्रीपाद भांगले यांना मानाचे स्थान मिळाले आहे. त्यांची असोसिएशनच्या खजिनदारपदी निवड करण्यात आली आहे. पंजाबमधील मोहाली येथे झालेल्या बैठकीत या निवडीची अधिकृत घोषणा करण्यात आली असून, भांगले यांच्या निवडीबद्दल सर्व स्तरांतून अभिनंदन केले जात आहे.
*निवडणूक प्रक्रियेनंतर घोषणा*
असोसिएशनच्या नुकत्याच पार पडलेल्या निवडणूक प्रक्रियेनंतर नवनिर्वाचित पदाधिकाऱ्यांच्या नावांची घोषणा गुरुवारी मोहाली येथे करण्यात आली. या बैठकीत असोसिएशनच्या अध्यक्षपदी कलिकेश नारायण सिंगदेव आणि सचिवपदी पवनकुमार सिंग यांची निवड जाहीर झाली. उपाध्यक्ष म्हणून कनवर सुलतान सिंग व सुषमा सिंग यांची निवड झाली आहे.
*सिंधुदुर्गसाठी विशेष प्रयत्न*
या प्रतिष्ठित असोसिएशनमध्ये खजिनदारपदाची जबाबदारी स्वीकारल्यानंतर विक्रम ऊर्फ मेघशाम भांगले यांनी आपल्या भावना व्यक्त केल्या. त्यांनी स्पष्ट केले की, रायफल असोसिएशनच्या माध्यमातून देशातील सर्व खेळाडूंना न्याय देण्यासाठी आपला प्रयत्न राहील. तसेच, सिंधुदुर्ग जिल्ह्यातील जास्तीत-जास्त खेळाडूंनी रायफल शूटिंग क्रीडा प्रकारात सहभागी व्हावे, यासाठी ते विशेष प्रयत्न करणार असल्याचे भांगले यांनी नमूद केले.
कार्यकारिणीतील अन्य महत्त्वाच्या पदांमध्ये सहाय्यक सचिवपदी रणदीप मान आणि गौरी मोहंती यांची निवड झाली आहे. सदस्य म्हणून शीला कानूनगो, कुमार त्रिपुरी सिंग, अमर जंग सिंग आणि नील सूडनीक हे कार्यभार सांभाळतील.
सावंतवाडीच्या सुपुत्राला राष्ट्रीय स्तरावर एवढे महत्त्वाचे पद मिळाल्याने जिल्ह्याच्या क्रीडा वर्तुळात उत्साहाचे आणि आनंदाचे वातावरण पसरले आहे.
