इन्स्ट्रुमेंट फ्लाइट रूल्स (IFR) मुळे प्रतिकूल हवामानातही विमान लँडिंग शक्य
विमानतळाची क्षमता वाढली : सहा विमाने एकाच वेळी पार्क करता येणार
सिंधुदुर्ग : कोकणच्या पर्यटन आणि दळणवळण क्षेत्रासाठी आजचा दिवस ऐतिहासिक ठरला आहे. आयआरबी इन्फ्रास्ट्रक्चर डेव्हलपर्स लिमिटेडद्वारे संचालित चिपी-परुळे येथील सिंधुदुर्ग विमानतळाला नागरी विमान वाहतूक महासंचालनालयाने (DGCA) २४x७ दिवस-रात्र आणि सर्वकालीन हवामानात (All-Weather Operations) विमान चालना करण्यासाठी अधिकृत मान्यता दिली आहे. या निर्णयामुळे आता कमी दृश्यमानता किंवा प्रतिकूल हवामानातही विमान सेवा विनाखंड सुरू राहण्याचा मार्ग मोकळा झाला आहे.
तांत्रिक अद्ययावतीकरण आणि सुरक्षा या मान्यतेमुळे सिंधुदुर्ग विमानतळ आता इन्स्ट्रुमेंट फ्लाइट रूल्स (IFR) साठी प्रमाणित झाले आहे. यामध्ये उपग्रह आधारित ‘आरएनपी’ (Required Navigation Performance) प्रक्रिया आणि बॅकअप नेव्हिगेशन यंत्रणेचा समावेश आहे. या प्रणालीमुळे वैमानिकांना अचूक तांत्रिक मार्गदर्शन मिळणार असून, पावसाळा किंवा धुक्याच्या काळातही सुरक्षित लँडिंग करणे शक्य होईल. यामुळे उड्डाणे रद्द होण्याचे प्रमाण घटून प्रवाशांचा प्रवास अधिक विश्वासार्ह होणार आहे.
*प्रवासी संख्येत विक्रमी वाढ आणि विस्तार*
सिंधुदुर्ग विमानतळाने लोकप्रियतेचा नवा टप्पा गाठला आहे. डिसेंबर महिन्यात प्रथमच विमानतळाने ११,००० प्रवाशांच्या वाहतुकीची नोंद केली. या कामगिरीमुळे भारतातील पहिल्या ७५ व्यस्त विमानतळांच्या यादीत सिंधुदुर्ग स्थान मिळवण्याची शक्यता आहे. वाढती गर्दी लक्षात घेऊन विमानतळाच्या पार्किंग क्षमतेत दुप्पट वाढ करण्यात आली आहे. आता एकाच वेळी तीन ऐवजी सहा विमाने पार्क करता येतील, अशी सोय करण्यात आली आहे.
*कोकणच्या विकासाला नवी गती*
या यशाबद्दल बोलताना आयआरबी सिंधुदुर्ग विमानतळाचे मुख्य सल्लागार आणि प्रमुख कॅप्टन जय एस. सदाना म्हणाले, “२४x७ कामकाजाच्या मंजुरीमुळे विमान कंपन्यांचा आत्मविश्वास वाढेल आणि वाहतुकीत मोठी वाढ होईल. राज्य प्रादेशिक कनेक्टिव्हिटी योजनेअंतर्गत मुंबई-सिंधुदुर्ग विमान मार्ग देखील लवकरच सुरू होणे अपेक्षित आहे. यामुळे कोकणवासीयांचा प्रवास सुखकर होईल आणि पर्यटन विकासाला मोठी चालना मिळेल.”
महत्वाचे ठळक मुद्दे:
स्थान: कुडाळपासून २१ किमी आणि गोवा (मोपा) पासून ५६ किमी अंतरावर.
फायदा: दक्षिण कोकण आणि उत्तर गोवा या दोन्ही भागांसाठी महत्त्वाचे प्रवेशद्वार.
क्षमता: ६ विमान पार्किंग बे आणि आयएफआर सपोर्ट.
खाजगी गुंतवणुकीतून उभारलेला आणि भारत सरकारच्या ‘उडान’ धोरणाशी सुसंगत असलेला हा विमानतळ आता खऱ्या अर्थाने कोकणच्या आर्थिक प्रगतीचे इंजिन ठरणार आहे.
