आंतरराष्ट्रीय सायकलिंग स्पर्धेचा ग्रामीण भागाला थेट फायदा
रस्ते सुधारणा, पर्यटन आणि व्यवसायाला नवी चालना
मुळशी आणि मावळ तालुक्यातील अनेक गावांमध्ये अचानक झालेल्या रस्ते सुधारणांमुळे नागरिकांमध्ये आश्चर्य आणि आनंदाचे वातावरण आहे. वर्षानुवर्षे खड्डेमय आणि अरुंद असलेले रस्ते काही आठवड्यांतच गुळगुळीत डांबरी मार्गात बदलले आहेत. पुणे ग्रँड टूर या आंतरराष्ट्रीय सायकलिंग स्पर्धेमुळे हा बदल शक्य झाला आहे. या रस्त्यांमुळे पर्यटन, स्थानिक व्यवसाय आणि सामाजिक संवादाला चालना मिळत आहे. मात्र, सायकलस्वारांनी सुरक्षिततेबाबत काही चिंता व्यक्त केल्या आहेत.
पुणे : मुळशी आणि मावळ तालुक्यातील खेड्यापाड्यांमध्ये सध्या अविश्वास, उत्सुकता आणि आनंद यांचे मिश्र वातावरण आहे. अनेक वर्षांपासून पुण्याशी जोडणारे अरुंद व खड्डेमय रस्ते काही आठवड्यांतच गुळगुळीत डांबरी मार्गात रूपांतरित झाले आहेत. पवना धरणाच्या निसर्गरम्य परिसरातून जाणारे हे रस्ते आता चित्रमय दृश्य निर्माण करत आहेत.
या बदलामागचे कारण म्हणजे पुणे ग्रँड टूर — UCI 2.2 दर्जाची आंतरराष्ट्रीय सायकलिंग स्पर्धा, जी पहिल्यांदाच भारतात आयोजित केली जात आहे. टूर डी फ्रान्ससारख्या आंतरराष्ट्रीय स्पर्धांची झलक देणाऱ्या या उपक्रमामुळे ग्रामीण रस्ते आणि गावे प्रकाशझोतात आली आहेत.
मुळशी तालुक्यातील कळवण गावातील दीपक दाभाडे (२४) यांनी सांगितले की, रस्ते सुधारल्यामुळे त्यांच्या व्यवसायावर सकारात्मक परिणाम झाला आहे. “पूर्वी रस्ते अतिशय खराब होते. आता काही ठिकाणी रुंदी तीन मीटरवरून सहा मीटर झाली आहे. पुण्यातील दुचाकीस्वार आणि सायकलस्वार आठवड्याच्या शेवटी येऊ लागले असून व्यवसाय वाढला आहे,” असे ते म्हणाले.
मावळमधील महागाव येथील नवनाथ पडवळ (६०) यांनी सांगितले की, नवीन कनेक्टिव्हिटीमुळे सामाजिक जीवनही समृद्ध झाले आहे. “आता या मार्गावर जास्त लोक येतात. त्यामुळे चहा आणि नाश्त्याची नवीन दुकाने सुरू झाली आहेत,” असे त्यांनी सांगितले.
दरम्यान, पुण्यातील सायकलस्वार कौस्तुभ राडकर यांनी रस्त्यांच्या गुणवत्तेचे स्वागत करतानाच वाहतूक शिस्त आणि सुरक्षिततेबाबत चिंता व्यक्त केली. “रस्ते चांगले झाले आहेत, पण रोजच्या सायकलस्वारांसाठी सुरक्षितता महत्त्वाची आहे. सुरुवातीला शहराबाहेर जाऊनच सायकल चालवावी लागेल,” असे ते म्हणाले.
पुणे व पिंपरी-चिंचवड महानगरपालिका, सार्वजनिक बांधकाम विभाग आणि इतर यंत्रणांनी मिळून ४३७ किमी रस्त्यांचे काम पूर्ण केले आहे. पुण्याचे जिल्हाधिकारी जितेंद्र दुडी यांनी प्रहार डिजिटल ला सांगितले की, “नवीन रस्ते बांधलेले नसून विद्यमान रस्त्यांचे सुधारणा काम कमी वेळात पूर्ण करण्यात आले आहे. हा परिसर जागतिक पर्यटन स्थळ म्हणून ओळख मिळवेल, अशी अपेक्षा आहे.”
पुणे ग्रँड टूर 2026 ची सुरुवात 19 जानेवारी रोजी होणार असून, पुढील पाच दिवसांत मुळशी-मावळ, मराठा हेरिटेज सर्किट, पश्चिम घाट आणि पुणे शहरातून विविध टप्प्यांमध्ये ही स्पर्धा पार पडणार आहे. या स्पर्धेमुळे ग्रामीण विकास, पर्यटन आणि आंतरराष्ट्रीय ओळख मिळण्याची शक्यता व्यक्त केली जात आहे.
