मोबाइल कार्यालय हलवताना वादातून प्राणघातक हल्ला
राजकीय वर्चस्वातून तणाव वाढल्याचा आरोप
हडपसर परिसरात शिवसेनेचे पदाधिकारी दीपक कुलाल यांच्यावर झालेल्या हल्ल्याने शहरातील राजकीय वातावरण तापले आहे. या प्रकरणी पोलिसांनी राष्ट्रवादी काँग्रेसचे कार्यकर्ते उल्हास तुपे आणि त्यांच्या समर्थकांविरोधात गुन्हा दाखल केला आहे. पक्षाचे तात्पुरते कार्यालय हलवताना हा वाद उफाळून आल्याचे समोर आले आहे. हल्ल्यात कुलाल यांना गंभीर दुखापत झाली असून डोक्यावर वीट मारल्याचा आरोप आहे. घटनेनंतर पोलिसांकडून पुढील तपास सुरू आहे.
पुणे : हडपसर येथील शिवसेना पदाधिकारी दीपक कुलाल यांच्यावर हल्ला केल्याप्रकरणी पोलिसांनी गुरुवारी राष्ट्रवादी काँग्रेसचे कार्यकर्ते उल्हास तुपे आणि त्यांच्या समर्थकांविरोधात एफआयआर दाखल केला आहे. उल्हास तुपे हे यापूर्वी उपमुख्यमंत्री एकनाथ शिंदे यांच्या शिवसेनेत होते आणि 15 जानेवारी रोजी झालेल्या पुणे महापालिका निवडणुकीत त्यांना उमेदवारी देण्यात आली होती.
मात्र, तुपे यांनी उमेदवारी अर्ज मागे घेतला आणि निवडणुकीच्या काही दिवस आधी उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेसमध्ये प्रवेश केला. शिवसेनेच्या पदाधिकाऱ्यांच्या माहितीनुसार पक्षाने शहरातील काही भागात मतदानाशी संबंधित कामकाजासाठी वाहन कंटेनरचे तात्पुरते कार्यालयात रूपांतर केले होते. हडपसरमधील असेच एक कार्यालय तुपे शिवसेनेत असताना त्यांना देण्यात आले होते.
तक्रारदार दीपक कुलाल यांनी प्रहार डिजिटल ला सांगितले की, शिवसेना प्रमुख एकनाथ शिंदे यांनी सेनेतून बाहेर पडलेल्या लोकांकडून कार्यालये ताब्यात घेण्याच्या सूचना दिल्या होत्या. त्यानुसार गुरुवारी पहाटे दीडच्या सुमारास ते इतर दोन कार्यकर्त्यांसह हडपसर येथील मोबाइल कार्यालय मांजरी येथे हलवण्यासाठी गेले होते.
कुलाल म्हणाले की, कंटेनर हलविण्याचा प्रयत्न सुरू असताना तुपे यांना याची माहिती मिळाली आणि त्यांनी इतर व्यक्तींना घेऊन घटनास्थळी धाव घेतली. यावेळी आमच्यावर हल्ला करण्यात आला. माझे दोन कार्यकर्ते पळून जाण्यात यशस्वी झाले, मात्र तुपे आणि त्यांच्या समर्थकांनी मला लक्ष्य केले. माझ्यावर प्राणघातक हल्ला करण्यात आला असून डोक्यावर वीट मारण्यात आली, असा आरोप कुलाल यांनी केला.
हडपसर पोलीस ठाण्याचे वरिष्ठ पोलीस निरीक्षक संजय मोगले यांनी सांगितले की, कुलाल यांच्या तक्रारीवरून स्वेच्छेने गंभीर दुखापत करण्याच्या कलमांखाली एफआयआर दाखल करण्यात आला आहे. उल्हास तुपे आणि इतर व्यक्तींचा एफआयआरमध्ये उल्लेख असून इतर संशयितांची ओळख पटवण्याचे प्रयत्न सुरू आहेत. वारंवार संपर्क साधूनही तुपे यांच्याशी संपर्क होऊ शकला नाही, असेही त्यांनी स्पष्ट केले.
दरम्यान, शिवसेनेच्या ज्येष्ठ नेत्या आणि विधान परिषदेच्या उपसभापती नीलम गोऱ्हे यांनी या घटनेवर तीव्र प्रतिक्रिया देत पुणे पोलिस आयुक्तांशी चर्चा करणार असल्याचे सांगितले. हा आमच्या कार्यकर्त्यावर झालेला अत्यंत घृणास्पद हल्ला असल्याचे त्यांनी नमूद केले. याआधीही शिवसेनेच्या उमेदवारांवर हल्ले झाले असून वेळीच कारवाई झाली असती तर ही घटना टळली असती, असा आरोप त्यांनी केला.
तसेच, महापालिका निवडणुकीच्या प्रचारादरम्यान शिवसेनेचे पुणे शहराध्यक्ष प्रमोद भानगिरे यांच्या वाहनावर हडपसर येथे दगडफेक झाल्याचा आरोपही करण्यात आला आहे. या पार्श्वभूमीवर राजकीय संघर्ष अधिक तीव्र होत असल्याचे चित्र स्पष्ट झाले आहे.
