अर्धवेळ कामाच्या आमिषाने महिलेला जाळ्यात ओढले
देशातील विविध राज्यांतील बँक खात्यांत पैसे ट्रान्सफर
कोथरूड परिसरातील एका ५२ वर्षीय महिलेला ऑनलाइन टास्क फ्रॉडद्वारे तब्बल २० लाख रुपयांचा आर्थिक फटका बसला आहे. अर्धवेळ काम आणि आकर्षक कमिशनचे आमिष दाखवून भामट्यांनी ही फसवणूक केल्याचे समोर आले आहे. सुरुवातीला लहान रकमेचे कमिशन देऊन विश्वास संपादन करण्यात आला. त्यानंतर अधिक कमिशनसाठी महिलेकडून मोठ्या रकमा वेगवेगळ्या बँक खात्यांत ट्रान्सफर करून घेण्यात आल्या. याप्रकरणी पुणे सायबर पोलिस आणि अलंकार पोलिसांकडून तपास सुरू आहे.
पुणे : कोथरूड येथील ५२ वर्षीय महिला गेल्या डिसेंबर महिन्यात ऑनलाइन टास्क फ्रॉडची शिकार ठरली असून, तिला २० लाख रुपयांचे नुकसान सहन करावे लागले आहे. ऑनलाइन अर्धवेळ काम आणि ८०० ते १,४०० रुपयांपर्यंत कमिशन देण्याचे आमिष दाखवून भामट्यांनी ही फसवणूक केल्याचे उघड झाले आहे.
महिलेने याप्रकरणी पुणे सायबर पोलिसांकडे तक्रार दाखल केली होती. प्राथमिक तपासानंतर बुधवारी अलंकार पोलिस ठाण्यात गुन्हा दाखल करण्यात आला आहे, अशी माहिती पोलिसांकडून देण्यात आली.
अलंकार पोलिसांच्या अधिकाऱ्यांनी दिलेल्या माहितीनुसार, २ डिसेंबर रोजी महिलेशी मोबाईल मेसेजिंग ॲपद्वारे संपर्क साधण्यात आला. तिला दिवसाला सुमारे चार तास अर्धवेळ काम आणि १,४०० रुपयांपर्यंत कमिशन मिळेल, असे सांगण्यात आले. ऑनलाइन बुकिंग आणि ट्रॅव्हल इंडस्ट्रीशी संबंधित काम असल्याचा दावा भामट्यांनी केला.
५-स्टार रेटिंग देऊन तिकिटांची विक्री वाढवण्याचे टास्क देण्यात आले. नोंदणी लिंक पाठवून वर्क आयडी तयार व सक्रिय करण्यासाठी पैसे भरण्यास सांगितले. सुरुवातीला काम पूर्ण केल्यानंतर महिलेला १,०४६ रुपये कमिशन मिळाले. त्यानंतर आणखी कामांमधून तिला सुमारे ६० हजार रुपये कमिशन देण्यात आले.
अधिक कमिशनच्या लालसेपोटी महिलेकडून वेगवेगळ्या बँक खात्यांमध्ये मोठ्या रकमा ट्रान्सफर करून घेण्यात आल्या. एकूण २० लाख रुपये विविध खात्यांत जमा झाल्याचे तपासात समोर आले आहे. १७ लाख रुपये काढण्याचा प्रयत्न केल्यावर भामट्यांनी पुन्हा पैसे ट्रान्सफर करण्यास सांगितले, तेव्हा महिलेला फसवणुकीची जाणीव झाली.
तपासात हे पैसे उत्तर प्रदेशातील देवरिया व लखनौ, राजस्थानमधील बारमेर, त्रिपुरातील आगरतळा तसेच मुंबईतील बँक खात्यांत पाठवण्यात आल्याचे उघड झाले आहे. पोलिसांनी संबंधित बँक खात्यांचा तपशील मागवला असून पुढील तपास सुरू आहे, अशी माहिती अलंकार पोलिसांनी दिली.
