रक्तनमुने बदल प्रकरणात समानतेच्या तत्त्वावर दिलासा
१० पैकी ५ आरोपी जामिनावर; खटल्यात सहकार्याचे आदेश
पुण्यातील कल्याणीनगर येथील गाजलेल्या पोर्शे अपघात प्रकरणात सहआरोपी अश्पाक बाशा मकानदार याला सर्वोच्च न्यायालयाने जामीन मंजूर केला आहे. रक्ताचे नमुने बदलल्याच्या आरोपावरून त्याला अटक करण्यात आली होती. समान प्रकरणातील सहआरोपीला यापूर्वी जामीन मिळाल्याने समानतेच्या तत्त्वावर हा दिलासा देण्यात आला. या प्रकरणात एकूण १० आरोपी असून त्यापैकी ५ जण सध्या जामिनावर आहेत. न्यायालयाने जामीन देताना खटल्यात पूर्ण सहकार्य करण्याचे आणि साक्षीदारांशी संपर्क न ठेवण्याचे स्पष्ट निर्देश दिले आहेत.
पुणे : शहरातील कल्याणीनगर परिसरात 19 मे 2024 रोजी झालेल्या पोर्शे कार अपघात प्रकरणात अल्पवयीन चालकाच्या रक्ताच्या नमुन्यांमध्ये फेरफार केल्याच्या आरोपातील सहआरोपी अश्पाक बाशा मकानदार याला सर्वोच्च न्यायालयाने बुधवारी जामीन मंजूर केला. न्यायालयाने हा निर्णय समानतेच्या तत्त्वावर दिला.
या प्रकरणात येरवडा पोलिसांनी दाखल केलेल्या गुन्ह्यात एकूण 10 आरोपी आहेत. त्यापैकी पाच आरोपी सध्या जामिनावर असून त्यात अल्पवयीन चालकाच्या आईचाही समावेश आहे. चालकाचे वडील, दोन निलंबित डॉक्टर, एक निलंबित शवागार कर्मचारी आणि आणखी एक सहआरोपी सध्या न्यायालयीन कोठडीत आहेत.
मकानदार आणि सहआरोपी अमर गायकवाड यांच्यावर अल्पवयीन चालकाच्या बिल्डर वडिलां आणि ससून रुग्णालयातील डॉक्टरां यांच्यात रक्तनमुने बदलण्यासाठी आर्थिक व्यवहारात मध्यस्थी केल्याचा आरोप आहे. मकानदारने यापूर्वी मुंबई उच्च न्यायालयाने 16 डिसेंबर 2025 रोजी जामीन फेटाळल्याच्या आदेशाविरोधात सर्वोच्च न्यायालयात अपील केले होते.
त्याच्या वकिलांनी सर्वोच्च न्यायालयात मांडणी करताना सांगितले की, संबंधित अपीलकर्त्याचे प्रकरण 2026 मधील Crl.A.N.629 (अमर संतोष गायकवाड विरुद्ध महाराष्ट्र राज्य) या प्रकरणाशी साधर्म्य असलेले आहे, ज्यामध्ये 2 फेब्रुवारी 2026 रोजी जामीन मंजूर करण्यात आला होता. मकानदार सुमारे 20 महिने तुरुंगात असल्याने समानतेच्या आधारावर त्यालाही दिलासा द्यावा, अशी मागणी करण्यात आली. राज्याच्या स्थायी वकिलांनीही न्यायालय योग्य आदेश देऊ शकते, असे नमूद केले.
न्यायमूर्ती बी. व्ही. नागरथना आणि न्यायमूर्ती उज्वल भुयान यांच्या खंडपीठाने नोंदवले की, सादर करण्यात आलेल्या बाबी लक्षात घेता जामिनासाठी योग्य कारणे आहेत. अपील मंजूर करत संबंधित ट्रायल कोर्टाने योग्य अटींसह जामीन मंजूर करावा, असे निर्देश देण्यात आले. तसेच 2024 च्या FIR क्रमांक 306 संदर्भातील खटल्यात अपीलकर्त्याने पूर्ण सहकार्य करावे आणि कोणत्याही साक्षीदारांशी प्रत्यक्ष किंवा अप्रत्यक्ष संपर्क साधू नये, असे स्पष्ट करण्यात आले.
या प्रकरणातील इतर आरोपींमध्ये अल्पवयीन चालकाचे वडील, त्याची आई, डॉ. अजय तावरे, डॉ. श्रीहरी हलनोर, दोन एजंट, अल्पवयीन मुलांचे वडील आणि एका वडिलांचा मित्र यांचा समावेश आहे. आरोपानुसार, कटाचा भाग म्हणून अल्पवयीन चालकाच्या रक्ताचा नमुना त्याच्या आईच्या नमुन्याशी बदलण्यात आला तसेच इतर अल्पवयीनांच्या नमुन्यांमध्येही फेरफार करण्यात आला.
19 मे 2024 रोजी पहाटे सुमारे 2.30 वाजता पोर्श टायकन कारने मोटारसायकलला धडक दिल्याने दोन तरुण सॉफ्टवेअर अभियंत्यांचा मृत्यू झाला होता. पोलिसांच्या माहितीनुसार, अल्पवयीन चालक मुंढवा येथील दोन पबमध्ये मित्रांसोबत पार्टी करून वडगावशेरी येथील घरी परतत असताना हा अपघात घडला.
