वानवडीतील ज्येष्ठ नागरिकाला बनावट अटक वॉरंट पाठवून धमकी
‘मनी लॉन्ड्रिंग’ प्रकरणात अडकवल्याची भीती दाखवत खात्यांमधून रक्कम हस्तांतरित
वानवडी परिसरातील ८६ वर्षीय निवृत्त बँक व्यवस्थापकाची सायबर चोरट्यांनी तब्बल १.२८ कोटी रुपयांची फसवणूक केली आहे. मुंबई पोलिस अधिकारी असल्याचे भासवून आरोपींनी बनावट अटक वॉरंट आणि व्हिडिओ कॉलद्वारे धमकावले. मनी लॉन्ड्रिंग प्रकरणात अटक टाळण्यासाठी तपासात सहकार्य करण्याच्या नावाखाली पीडितेकडून बँक खात्यांची माहिती घेतली. डिसेंबर ते जानेवारी दरम्यान ही फसवणूक घडली असून या महिन्यात तक्रार पडताळल्यानंतर गुन्हा दाखल करण्यात आला. पुणे सायबर क्राइम पोलिस पुढील तपास करत आहेत.
पुणे : वानवडी परिसरात राहणाऱ्या ८६ वर्षीय निवृत्त बँक व्यवस्थापकाला सायबर भामट्यांनी मुंबई पोलिस अधिकारी असल्याचे भासवून तब्बल १.२८ कोटी रुपयांचा गंडा घातल्याची धक्कादायक घटना समोर आली आहे. ही फसवणूक १९ डिसेंबर ते २१ जानेवारी दरम्यान घडली.
या महिन्याच्या सुरुवातीला दाखल झालेल्या तक्रार अर्जाची पडताळणी केल्यानंतर पुणे सायबर क्राइम पोलिसांनी बुधवारी एफआयआर नोंदवला. संबंधित ज्येष्ठ नागरिक आपल्या फ्लॅटमध्ये एकटे राहतात, तर त्यांच्या मुली शेजारी राहतात, अशी माहिती पोलिसांनी दिली.
सायबर क्राईमच्या वरिष्ठ पोलिस निरीक्षक स्वप्नाली शिंदे यांनी प्रहार डिजिटलला सांगितले की, आरोपींनी स्वतःला मुंबई पोलिस अधिकारी असल्याचे सांगून फोन केला. पीडितेविरुद्ध कुलाबा पोलिस ठाण्यात गुन्हा दाखल झाल्याचा दावा करण्यात आला. तसेच, पोलिसांचा गणवेश परिधान करून मोबाईल मेसेजिंग अॅपवर व्हिडिओ कॉल करण्यात आला.
संशयितांनी पीडितेचे बँक खाते मनी लॉन्ड्रिंगसाठी वापरले गेले असल्याचा आरोप केला. त्यांच्या मोबाईल क्रमांकाचाही गैरवापर झाल्याचे सांगून लवकरच अटक केली जाईल आणि कुटुंबाचे नाव बदनाम होईल, अशी भीती दाखवली. आरोपींनी मुंबई न्यायालयाचे बनावट अटक वॉरंट देखील पाठवले.
तपासात सहकार्य करण्याच्या बहाण्याने आरोपींनी पीडितेकडून तीन बँक खात्यांची माहिती घेतली. अटक टाळण्यासाठी कथित लाँडरिंग रकमेच्या बदल्यात सात वेगवेगळ्या खात्यांमध्ये पैसे पाठवण्यास सांगितले. भीतीपोटी पीडितेने एकूण १.२८ कोटी रुपये हस्तांतरित केले, असे शिंदे यांनी सांगितले.
दरम्यान, त्यांच्या एका मुलीने घरी भेट दिली असता वडिलांच्या वागण्यात बदल जाणवला. चौकशी केल्यानंतर संपूर्ण प्रकार उघडकीस आला. सायबर क्राइम विभाग अधिक तपशील आणि संबंधित धागेदोरे शोधण्यासाठी तपास करत आहे.
