शू रॅकमध्ये ठेवलेली चावी ठरली चोरीस कारणीभूत
जुनी सांगवी परिसरातील घटना; पोलिसांचा तपास सुरू
पुण्यातील जुनी सांगवी परिसरात शू रॅकमध्ये ठेवलेली घराच्या मुख्य दरवाजाची चावी एका कुटुंबाला महागात पडली. अज्ञात चोरट्याने त्या चावीचा वापर करून घरात प्रवेश करत सुमारे एक लाख रुपयांचे सोन्याचे दागिने लंपास केले. दुपारी कुटुंब घरी परतल्यानंतर ही बाब उघडकीस आली. कपाटात ठेवलेले दागिने गायब असल्याचे लक्षात येताच पोलिसांत तक्रार दाखल करण्यात आली. सांगवी पोलिसांनी या प्रकरणाचा तपास सुरू केला असून आरोपीचा शोध घेतला जात आहे.
पुणे : जुनी सांगवी परिसरात घडलेल्या घरफोडीच्या घटनेमुळे परिसरात खळबळ उडाली आहे. ४७ वर्षीय व्यक्तीने घराच्या मुख्य दरवाजाची चावी शू रॅकमध्ये ठेवली होती. मंगळवारी दुपारी अज्ञात चोरट्याने हीच संधी साधत चावीने दरवाजा उघडला आणि घरातील सुमारे एक लाख रुपयांचे सोन्याचे दागिने चोरून नेले. या प्रकरणी बुधवारी सांगवी पोलीस ठाण्यात तक्रार दाखल करण्यात आली आहे.
पोलिसांनी दिलेल्या माहितीनुसार, तक्रारदार सकाळी कामावर जाताना मुलासाठी चावी बाहेरील शू रॅकमध्ये ठेवून गेला होता. दुपारी सुमारे २.१५ वाजता तक्रारदार, त्यांची पत्नी आणि मुलगा घरी परतले. तक्रारदाराने शू रॅकमधून चावी घेऊन दरवाजा उघडला. त्यानंतर पत्नी कपाटात दागिने ठेवण्यासाठी गेली असता, आधी ठेवलेले दागिने गायब असल्याचे तिच्या लक्षात आले.
यानंतर कुटुंबीयांनी घरभर शोधाशोध केली; मात्र दागिने सापडले नाहीत. अखेर त्यांनी तत्काळ पोलिसांशी संपर्क साधत तक्रार नोंदवली. सांगवी पोलिसांनी घटनास्थळी भेट देत पंचनामा केला असून चोरीचा तपास सुरू असल्याची माहिती अधिकाऱ्यांनी दिली.
