विद्यार्थ्याच्या मृत्यूनंतर पोलिसांची कारवाई
निकृष्ट देखभालीमुळे अपघात झाल्याचा आरोप
पुण्यातील इंदोरी येथील तोलानी मेरीटाईम इन्स्टिट्यूटमध्ये झालेल्या अपघातानंतर मोठी कारवाई करण्यात आली आहे. विद्यार्थ्याच्या मृत्यूप्रकरणी प्राचार्यांसह चौघांविरोधात गुन्हा दाखल करण्यात आला आहे. बास्केटबॉल पोस्ट कोसळल्याने हा अपघात घडल्याचे समोर आले. देखभालीतील निष्काळजीपणामुळे ही घटना घडल्याचा आरोप आहे. या प्रकरणामुळे शैक्षणिक संस्थांतील सुरक्षेचा मुद्दा पुन्हा ऐरणीवर आला आहे.
पुणे : तळेगाव एमआयडीसी पोलिसांनी मावळ तालुक्यातील इंदोरी येथील तोलानी मेरीटाईम इन्स्टिट्यूटच्या प्राचार्य, व्यवस्थापक, क्रीडा विभाग प्रमुख आणि ग्राऊंड मेंटेनन्स कर्मचाऱ्यांविरोधात निष्काळजीपणामुळे मृत्यूस कारणीभूत ठरल्याचा गुन्हा नोंदवला आहे.
ही घटना 5 एप्रिल रोजी सकाळी 7.30 वाजण्याच्या सुमारास घडली. विशाल वर्मा हा नियमित व्यायाम करून वसतिगृहाकडे परतत असताना त्याने बास्केटबॉल हुपला लटकून व्यायाम करण्याचा प्रयत्न केला.
त्यावेळी खांबाला वजन सहन करता आले नाही आणि संपूर्ण संरचना कोसळली. या अपघातात विशालच्या डोक्याला गंभीर दुखापत झाली. त्याला तळेगाव दाभाडे येथील रुग्णालयात दाखल करण्यात आले, मात्र उपचारादरम्यान सकाळी 10 वाजता त्याचा मृत्यू झाला.
विशालचा भाऊ अशोक वर्मा यांनी तळेगाव एमआयडीसी पोलिसांत तक्रार दाखल केली. त्यानुसार पोलिसांनी भारतीय न्याय संहिता कलम 106 आणि 3(5) अंतर्गत गुन्हा नोंदवला आहे.
तक्रारीत नमूद केल्याप्रमाणे, बास्केटबॉल खांब सुमारे 15 वर्षांपूर्वी बसवण्यात आला होता आणि तो गंजलेला व निकृष्ट अवस्थेत होता. योग्य देखभाल न केल्यामुळे हा अपघात घडल्याचा आरोप करण्यात आला आहे.
दरम्यान, संस्थेचे प्राचार्य संजीत कानुनगो यांनी सांगितले की, कॅम्पसमधील सर्व क्रीडा आणि मनोरंजन सुविधांचे ऑडिट सुरू करण्यात आले आहे आणि विद्यार्थ्यांच्या सुरक्षेला सर्वोच्च प्राधान्य दिले जाईल.
पोलिसांनी यापूर्वी आकस्मिक मृत्यूची नोंद केली होती, मात्र कुटुंबीयांच्या तक्रारीनंतर निष्काळजीपणाचा गुन्हा दाखल करण्यात आला. सध्या विद्यार्थी आणि संबंधित अधिकाऱ्यांचे जबाब नोंदवले जात आहेत.
