नसरापूर परिसरात घडलेल्या घटनेने परिसरात संतापाचे वातावरण
आरोपी ताब्यात; पोलिसांकडून कसून तपास सुरू
पुणे जिल्ह्यातील भोर तालुक्यातील नसरापूर परिसरात एक अत्यंत हृदयद्रावक घटना घडली आहे. अवघ्या 4 वर्षांच्या चिमुकलीची दगडाने ठेचून निर्घृण हत्या करण्यात आली असून, तिचा मृतदेह शेणाच्या ढिगाऱ्यात लपवण्यात आल्याची धक्कादायक माहिती समोर आली आहे. या घटनेनंतर परिसरात संताप आणि भीतीचे वातावरण निर्माण झाले आहे. संशयित आरोपीला पोलिसांनी ताब्यात घेतले असून तपास सुरू आहे.
पुणे : पुणे जिल्ह्यातील भोर तालुक्यातील नसरापूर परिसरात एक अत्यंत धक्कादायक आणि अमानुष घटना उघडकीस आली आहे. येथे अवघ्या 4 वर्षांच्या चिमुकलीची निर्घृण हत्या करण्यात आल्याने संपूर्ण परिसर हादरला आहे.
मिळालेल्या माहितीनुसार, भीमराव कांबळे (वय 65) या संशयित व्यक्तीने चिमुकलीला घराबाहेर नेऊन दगडाने मारहाण करत तिचा खून केल्याचा आरोप आहे. त्यानंतर मृतदेह शेणाच्या ढिगाऱ्यात लपवण्यात आला.
ही घटना उघडकीस आल्यानंतर परिसरात खळबळ उडाली असून स्थानिक नागरिकांनी तीव्र संताप व्यक्त केला आहे. मुलगी अचानक दिसेनाशी झाल्याने शोधमोहीम राबवण्यात आली होती, त्यावेळी तिचा मृतदेह सापडला.
पोलिसांनी तात्काळ कारवाई करत संशयित आरोपीला ताब्यात घेतले असून त्याची कसून चौकशी सुरू आहे. घटनेमागील नेमका उद्देश अद्याप स्पष्ट झालेला नाही.
या घटनेनंतर गावात तणावाचे वातावरण निर्माण झाले आहे. ग्रामस्थांनी आरोपीला कठोर शिक्षा देण्याची मागणी केली आहे.
