सावंतवाडीत १२ मे रोजी सत्कार व परिसंवाद
सावंतवाडी | प्रतिनिधी : जिल्ह्यातील पर्यावरण आणि वन्यजीव संरक्षणासाठी झटणाऱ्या कार्यकर्त्यांच्या कार्याची दखल घेत, शासनातर्फे नवनियुक्त जिल्हा वन्यजीव रक्षक यांचा भव्य सत्कार समारंभ आणि विशेष परिसंवादाचे आयोजन करण्यात आले आहे. हा कार्यक्रम मंगळवार, १२ मे २०२६ रोजी सकाळी ११:०० वाजता सावंतवाडी येथील काझी शहाबुद्दीन हॉल येथे संपन्न होणार आहे.
सिंधुदुर्ग जिल्ह्यासाठी शासनातर्फे पुढील तीन वर्षांकरिता ‘जिल्हा वन्यजीव रक्षक’ म्हणून दोन नामवंत तज्ज्ञांची निवड करण्यात आली आहे. यामध्ये तिलारी (दोडामार्ग) येथील वन्यजीव तज्ज्ञ संजय सावंत आणि रानबांबूळी येथील पक्षीतज्ज्ञ भाग्यश्री परब यांचा समावेश आहे. त्यांच्या प्रदीर्घ अनुभवाचा आणि वन्यजीव क्षेत्रातील भरीव कार्याचा गौरव या निमित्ताने केला जाणार आहे.
विशेष परिसंवादाचे आयोजन
सत्कार समारंभानंतर “जैवविविधता आणि सिंधुदुर्गातील वन्यजीवन” या विषयावर एका विशेष परिसंवादाचे आयोजन करण्यात आले आहे. या सत्रात जिल्ह्यातील पर्यावरणापुढील वाढती आव्हाने, मानव-वन्यजीव संघर्ष आणि संवर्धनाच्या भविष्यातील संधी यावर सविस्तर चर्चा होणार आहे. कोकणच्या विशेष जैवविविधतेचे जतन करण्यासाठी या क्षेत्रातील तज्ज्ञांचे मार्गदर्शन उपस्थितांना लाभणार आहे.
जिल्ह्यातील सर्व पर्यावरण संवर्धन कार्यकर्ते, निसर्गप्रेमी, सामाजिक संस्थांचे प्रतिनिधी आणि वन्यजीव संवर्धन क्षेत्रात कार्यरत असलेल्या सदस्यांनी या कार्यक्रमाला मोठ्या संख्येने उपस्थित राहावे, असे आवाहन सामाजिक कार्यकर्ते डॉ. जयेंद्र परुळेकर यांच्याकडून करण्यात आले आहे.
