कल्याणमधील अशोक नगर परिसरात कौटुंबिक वादाचे गंभीर रूप पाहायला मिळाले. तलाकच्या चर्चेदरम्यान सुरू झालेला वाद थेट जीवघेण्या हल्ल्यापर्यंत पोहोचला. पती, सासरा, दीर आणि नणंद यांनी महिलेसह तिच्या भावावर चाकू आणि दगडाने हल्ला केल्याचा आरोप आहे. जखमी बहिण-भावाला गंभीर अवस्थेत रुग्णालयात दाखल करण्यात आले असून पोलिसांनी मुख्य आरोपीला अटक केली आहे. या घटनेमुळे परिसरात मोठी खळबळ उडाली असून नागरिकांमध्ये भीतीचे वातावरण निर्माण झाले आहे.
तलाकच्या चर्चेदरम्यान पुन्हा उफाळला वाद
कल्याण : कल्याणच्या वालधुनी येथील अशोक नगर परिसरात कौटुंबिक वादातून धक्कादायक घटना समोर आली आहे. रुक्सार नावाच्या महिलेवर तिचा पती तन्वीर फरीद खान, दीर, सासरा आणि नणंद यांनी मिळून जीवघेणा हल्ला केल्याचा आरोप करण्यात आला आहे. या हल्ल्यात रुक्सारसोबत तिचा भाऊ असलम हेदेखील गंभीर जखमी झाले आहेत.
मिळालेल्या माहितीनुसार, रुक्सारचा विवाह सुमारे आठ वर्षांपूर्वी तन्वीर खान याच्यासोबत झाला होता. मात्र लग्नानंतर काही काळातच तिला शारीरिक आणि मानसिक छळाला सामोरे जावे लागत होते. या त्रासामुळे तिने यापूर्वी आत्महत्येचाही प्रयत्न केल्याचे सांगितले जात आहे.
दरम्यान, 12 एप्रिल 2026 रोजी दोन्ही कुटुंबांमध्ये तलाकच्या मुद्द्यावर चर्चा करण्यासाठी बैठक आयोजित करण्यात आली होती. मात्र या बैठकीत पुन्हा वाद निर्माण झाला. दोन्ही बाजूंमध्ये जोरदार शाब्दिक बाचाबाची झाली आणि प्रकरण अधिकच चिघळले.
पोलिस ठाण्याबाहेर चाकू आणि दगडाने हल्ला
वादानंतर रुक्सार आणि तिचा भाऊ असलम हे तक्रार देण्यासाठी महात्मा फुले पोलिस ठाण्यात गेले होते. याचवेळी आरोपींनी त्यांचा पाठलाग करत पोलिस ठाण्याजवळच त्यांच्यावर चाकू आणि दगडाने हल्ला केला. या घटनेनंतर परिसरात एकच खळबळ उडाली. जीव वाचवण्यासाठी दोघांनी पोलिस ठाण्याकडे धाव घेतली असल्याची माहिती समोर आली आहे.
या हल्ल्यात रुक्सार आणि असलम दोघेही गंभीर जखमी झाले असून त्यांना तातडीने मीरा रुग्णालयात दाखल करण्यात आले. डॉक्टरांनी दिलेल्या माहितीनुसार, रुक्सारच्या शरीरावर अनेक टाके पडले असून असलमची प्रकृती चिंताजनक असल्याचे सांगण्यात आले आहे.
घटनेची माहिती मिळताच महात्मा फुले पोलिसांनी तातडीने कारवाई करत मुख्य आरोपी तन्वीर खान याला ताब्यात घेतले. पोलिसांच्या माहितीनुसार, तन्वीर हा सराईत गुन्हेगार असून त्याच्यावर यापूर्वीही विविध गुन्हे दाखल आहेत. सध्या इतर आरोपी फरार असून त्यांचा शोध सुरू आहे.
या घटनेनंतर परिसरात तणावाचे वातावरण निर्माण झाले असून स्थानिक नागरिकांकडून संताप व्यक्त केला जात आहे. पोलिसांकडून पुढील तपास सुरू आहे.
