पिंपरी-चिंचवडमधील चर्चित गोळीबार प्रकरणाचा पोलिसांनी मोठा उलगडा केला आहे. बिश्नोई गँगशी संबंधित तीन शूटरना अटक करण्यात आली असून खंडणीसाठी हा हल्ला घडवून आणल्याची माहिती समोर आली आहे. व्यापाऱ्याकडे दोन कोटी रुपयांची खंडणी मागण्यात आली होती. पैसे न दिल्याने गोळीबार करण्यात आल्याचा आरोप आहे. या तपासात सिद्धू मूसेवाला हत्याकांडाशी संबंधित धागेदोरेही समोर आल्याने प्रकरण अधिक गंभीर बनले आहे.

दोन कोटींच्या खंडणीसाठी व्यापाऱ्यावर गोळीबार

पिंपरी-चिंचवड : रावेत-ताथवडे बीआरटी रोडवरील ‘ए. जे. मॉल’ बाहेर झालेल्या गोळीबार प्रकरणाने संपूर्ण परिसरात खळबळ उडाली होती. 15 मे रोजी मॉलचे भागीदार जगदीश बिश्नोई बसलेले असताना दोन अज्ञात हल्लेखोरांनी त्यांच्यावर अचानक गोळीबार केला. हल्लेखोरांनी 5 ते 6 गोळ्या झाडल्या, मात्र सुदैवाने जगदीश बिश्नोई बचावले.

तपासात समोर आलेल्या माहितीनुसार, या हल्ल्यापूर्वी जगदीश बिश्नोई यांचे भागीदार अशोक कुमार बिश्नोई यांना व्हॉट्सअॅप कॉलद्वारे दोन कोटी रुपयांची खंडणी मागण्यात आली होती. पैसे न दिल्यास जीवे मारण्याची धमकी देण्यात आली होती. मात्र या धमकीकडे दुर्लक्ष केल्यानंतर गोळीबार करण्यात आल्याचा आरोप आहे.

400 सीसीटीव्ही फुटेज तपासून आरोपींना अटक

या गंभीर प्रकरणाच्या तपासासाठी पोलिसांनी विशेष पथके तयार केली होती. गुंडा विरोधी पथक आणि इतर तपास पथकांनी जवळपास 400 सीसीटीव्ही फुटेजची तपासणी केली. तांत्रिक विश्लेषण आणि गुप्त माहितीच्या आधारे पोलिसांनी हरियाणा आणि उत्तराखंडमधील हरिद्वार येथे छापे टाकले.

हरिद्वारमधील एका लॉजमधून तिन्ही शूटरना अटक करण्यात आली. चौकशीत आरोपींनी बिश्नोई गँगशी संबंध असल्याचे मान्य केल्याची माहिती समोर आली आहे.

तपासादरम्यान आणखी धक्कादायक माहिती समोर आली आहे. या प्रकरणात सिद्धू मूसेवाला हत्याकांडाशी संबंधित काही आरोपींचे नावही समोर येत असल्याचे सांगितले जात आहे. आरोपींना पिस्तुले, काडतुसे, वाहन आणि आर्थिक मदत पुरवण्यात आल्याचा संशय पोलिसांनी व्यक्त केला आहे.

याशिवाय, काही व्यापाऱ्यांनाही अशाच प्रकारे खंडणीसाठी धमक्या देण्यात आल्याचे तपासात उघड झाले आहे. त्यामुळे व्यापारी वर्गात भीतीचे वातावरण निर्माण झाले असून पोलिसांकडून पुढील तपास सुरू आहे.

प्रहार डिजिटल