पुण्यातील फुगेवाडी परिसरात घडलेल्या विषारी दारूकांडामुळे नागरिकांमध्ये संतापाची लाट उसळली आहे. या प्रकरणात 18 हून अधिक जणांचा मृत्यू झाल्यानंतर तपास सीआयडीकडे सोपविण्यात आला आहे. तपासाच्या अनुषंगाने आरोपींना घटनास्थळी आणण्यात आले असता संतप्त नागरिकांनी त्यांच्याविरोधात आक्रमक भूमिका घेतली. परिस्थिती नियंत्रणाबाहेर जाण्याची शक्यता निर्माण झाल्याने पोलिसांनी तातडीने हस्तक्षेप केला. सध्या परिसरात कडेकोट पोलीस बंदोबस्त ठेवण्यात आला असून तपास सुरू आहे.
घटनास्थळी आरोपींना आणताच नागरिकांचा संताप
पुणे : पिंपरी-चिंचवडमधील फुगेवाडी परिसरात घडलेल्या विषारी दारूकांड प्रकरणात मृतांचा आकडा 18 हून अधिक झाला असून अनेक जणांवर उपचार सुरू आहेत. या गंभीर घटनेचा तपास सध्या सीआयडीकडे सोपविण्यात आला आहे.
तपासाचा भाग म्हणून सीआयडीने काही आरोपींना घटनास्थळी आणून सीन रिक्रिएशन आणि पंचनामा प्रक्रिया केली. आरोपी घटनास्थळी पोहोचताच परिसरातील नागरिक मोठ्या संख्येने जमा झाले. या वेळी संतप्त नागरिकांनी आरोपींविरोधात तीव्र भावना व्यक्त करत आक्रमक भूमिका घेतली.
पोलिसांनी परिस्थिती नियंत्रणात आणली
जमावातील काही नागरिक आरोपींकडे धाव घेण्याचा प्रयत्न करताच परिसरात काही काळ तणावाचे वातावरण निर्माण झाले. परिस्थिती हाताबाहेर जाण्याची शक्यता लक्षात घेऊन पोलिसांनी तातडीने हस्तक्षेप केला आणि आरोपींभोवती सुरक्षा कवच उभे केले.
काही तरुणांनी रोष व्यक्त करत गोंधळ घालण्याचा प्रयत्न केल्याची माहिती समोर आली आहे. मात्र पोलिसांनी वेळीच परिस्थिती नियंत्रणात आणत कोणताही अनुचित प्रकार घडू दिला नाही. त्यानंतर आरोपींना कडेकोट पोलीस बंदोबस्तात तेथून रवाना करण्यात आले.
विषारी दारूकांडामुळे परिसरात अद्यापही संतापाचे वातावरण कायम असून या प्रकरणातील दोषींवर कठोर कारवाई करण्याची मागणी नागरिकांकडून केली जात आहे. दरम्यान, सीआयडीकडून घटनेचा सखोल तपास सुरू असून पुढील तपासानंतर अधिक माहिती समोर येण्याची शक्यता आहे.
