केरळमधील इडुक्की जिल्ह्यात सोमवारी सकाळी दुर्दैवी घटना घडली. शाळेत जाणाऱ्या मुलीसोबत असलेल्या एका महिलेवर जंगली हत्तीने हल्ला केल्याने तिचा मृत्यू झाला. या घटनेत तिची मुलगी गंभीर जखमी झाली असून तिच्यावर रुग्णालयात उपचार सुरू आहेत. मुसळधार पाऊस आणि दाट धुक्यामुळे हत्ती दिसला नसल्याचे प्राथमिक माहितीतून समोर आले आहे. घटनेनंतर परिसरात भीतीचे वातावरण निर्माण झाले आहे.
दाट धुक्यात अचानक समोर आले हत्ती
मुन्नार : केरळच्या इडुक्की जिल्ह्यातील मुन्नारजवळील चिन्नाक्कनाल परिसरात सोमवारी सकाळी जंगली हत्तीच्या हल्ल्यात एका 36 वर्षीय महिलेचा मृत्यू झाला, तर तिची मुलगी गंभीर जखमी झाली. ही घटना देवीकुलम वन परिक्षेत्रातील सिंगुकंदमजवळील ट्रान्सफर कर्वे येथे सकाळी सुमारे 8 वाजता घडली.
मृत महिलेचे नाव मारी असून ती सिंगुकंदम येथील रहिवासी होती. वन विभागाच्या माहितीनुसार, मारी आपल्या मुलीला शाळेत घेऊन जात असताना रस्त्यालगत उभे असलेले दोन जंगली हत्ती त्यांच्या समोर आले.
हल्ल्यात मुलगीही जखमी; रुग्णालयात उपचार सुरू
त्या वेळी परिसरात मुसळधार पाऊस आणि दाट धुके असल्याने महिलेला हत्ती दिसले नाहीत. अचानक समोर आलेल्या हत्तींपैकी एका हत्तीने हल्ला चढवत महिलेला पायदळी तुडवले. या हल्ल्यात तिची मुलगीही गंभीर जखमी झाली.
जखमी मुलीला तातडीने आदिमळी तालुका रुग्णालयात उपचारासाठी दाखल करण्यात आले आहे. दरम्यान, मृत महिलेचा मृतदेह शवविच्छेदनासाठी त्याच रुग्णालयात हलविण्यात आला आहे.
