स्क्रीनवर दिसणारे बनावट बटण ठरू शकते आर्थिक फसवणुकीचे कारण
सायबर चोरांची नवी ट्रिक; मोबाईल डेटा आणि बँक खात्याला धोका
अँड्रॉइड आणि आयफोन वापरकर्त्यांसाठी सायबर सुरक्षेचा गंभीर इशारा देण्यात आला आहे. सायबर गुन्हेगारांनी एक नवी फसवणूक पद्धत विकसित केली असून, त्यात स्क्रीनवर अचानक दिसणारे बनावट बटण वापरकर्त्यांना लक्ष्य करत आहे. या बटणावर नकळत क्लिक केल्यास मोबाईल हॅक होण्याची आणि बँक खात्यातील रक्कम चोरी होण्याची शक्यता निर्माण होते. तज्ज्ञांनी यापासून सावध राहण्याचे आवाहन केले आहे.
प्रहार डिजिटल : आजच्या डिजिटल युगात सायबर फसवणुकीचे प्रकार दिवसेंदिवस वाढत आहेत. अलीकडेच समोर आलेल्या एका नव्या प्रकारात अँड्रॉइड आणि आयफोन वापरकर्त्यांना लक्ष्य केले जात असल्याची माहिती समोर आली आहे.
या फसवणुकीत वापरकर्त्यांच्या मोबाईल स्क्रीनवर अचानक बनावट बटण (fake button) दिसते. हे बटण खरे असल्याचा भास निर्माण करून वापरकर्त्यांना क्लिक करण्यास प्रवृत्त केले जाते. मात्र, एकदा क्लिक झाल्यानंतर डिव्हाइसमध्ये मालवेअर इन्स्टॉल होऊन मोबाईल हॅक होण्याचा धोका निर्माण होतो.
सायबर तज्ज्ञांच्या मते, अशा प्रकारच्या हल्ल्यांमुळे केवळ फोनच नाही तर त्यात सेव्ह केलेली बँकिंग माहिती, ओटीपी आणि वैयक्तिक डेटा देखील धोक्यात येऊ शकतो. परिणामी वापरकर्त्यांचे आर्थिक नुकसान होण्याची शक्यता अधिक असते.
तज्ज्ञांनी सांगितले की, अनोळखी पॉप-अप्स, संशयास्पद लिंक आणि अचानक दिसणारी बटणे यावर क्लिक करणे टाळावे. तसेच मोबाईलमध्ये अपडेटेड अँटीव्हायरस आणि सिक्युरिटी सेटिंग्ज सक्रिय ठेवणे आवश्यक आहे.
या नव्या सायबर ट्रिकमुळे डिजिटल व्यवहार करणाऱ्या सर्व वापरकर्त्यांनी अधिक सावध राहण्याची गरज व्यक्त केली जात आहे.
