#
अंधश्रद्धा, लोभ आणि तंत्रविद्येच्या नावाखाली घडला थरारक गुन्हा
सहा दिवसांच्या तपासानंतर पोलिसांनी तिघांना केली अटक
मध्य प्रदेशातील रायसेन जिल्ह्यात अंधश्रद्धा आणि गुप्त खजिन्याच्या हव्यासातून एका प्रतिष्ठित व्यापाऱ्याची निर्घृण हत्या करण्यात आल्याची धक्कादायक घटना समोर आली आहे. बेपत्ता झाल्यानंतर काही दिवसांनी त्यांचा मृतदेह नदीकाठी पुरलेल्या अवस्थेत आढळून आला. पोलिसांच्या सखोल तपासात तंत्रक्रियेच्या नावाखाली नरबळी दिल्याचे उघड झाले असून या प्रकरणात तीन मुख्य आरोपींना अटक करण्यात आली आहे. या घटनेमुळे संपूर्ण परिसरात मोठी खळबळ उडाली आहे. पोलिसांकडून पुढील तपास सुरू असून आणखी काही धागेदोरे शोधले जात आहेत.
रायसेन : मध्य प्रदेशातील रायसेन जिल्ह्यात अंधश्रद्धा आणि गुप्त खजिन्याच्या हव्यासातून घडलेल्या एका भीषण हत्याकांडाने संपूर्ण राज्य हादरले आहे. ७ जुलैपासून बेपत्ता असलेले ४२ वर्षीय सावकार आणि प्रतिष्ठित व्यापारी विजय जैन यांची तंत्रक्रियेच्या नावाखाली कुऱ्हाडीने गळा चिरून हत्या करण्यात आल्याचे पोलिस तपासात समोर आले आहे. सहा दिवसांच्या तपासानंतर पोलिसांनी या कटाचा पर्दाफाश करत तीन मुख्य आरोपींना अटक केली आहे.
ही घटना रायसेन जिल्ह्यातील गैरतगंज परिसरात घडली. मृत विजय जैन हे परिसरातील प्रसिद्ध आणि प्रतिष्ठित व्यापारी कुटुंबातील होते. विशेष म्हणजे, २०१३ मध्ये जैन कुटुंबाच्या सुमारे तीन कोटी रुपयांच्या दरोड्याची घटना राज्यभर गाजली होती. त्यानंतर विजय जैन यांनी कुटुंबाचा सावकारी आणि इतर व्यावसायिक व्यवहार सांभाळण्याची जबाबदारी स्वीकारली होती.
नदीकाठी पुरलेल्या मृतदेहाची कृत्रिम दातांच्या आधारे ओळख
विजय जैन हे ७ जुलै रोजी संशयास्पदरीत्या बेपत्ता झाले होते. त्यानंतर ९ जुलै रोजी त्यांच्या बेपत्ता झाल्याची तक्रार दाखल करण्यात आली. १३ जुलै रोजी परासिया नदीकाठी मातीमध्ये पुरलेला एक मृतदेह आढळून आला. मृतदेहाचे हात आणि पाय बाहेर दिसत असल्याने ग्रामस्थांनी पोलिसांना माहिती दिली. आरोपींनी पुरावा नष्ट करण्यासाठी मृतदेह नदीकाठी पुरल्याचा संशय व्यक्त करण्यात आला. घटनास्थळी सापडलेले कपडे, मोबाईल आणि कृत्रिम दात यांच्या आधारे कुटुंबीयांनी मृताची ओळख विजय जैन अशी पटवली. त्यानंतर रायसेनचे एसपी आशुतोष गुप्ता, एएसपी दीपक नायक, एफएसएल आणि डॉग स्क्वॉड यांनी घटनास्थळी पाहणी करून पंचनामा केला.
‘धरती गरम झाली आहे, बळी हवा आहे’ म्हणत केला खून
एसडीओपी सोनाली गुप्ता आणि पोलीस निरीक्षक डी.पी. लोहिया यांच्या पथकाने संशयित प्रल्हाद साहू याची कसून चौकशी केली. चौकशीत अत्यंत धक्कादायक माहिती समोर आली. प्रल्हाद साहू हा स्वतःला तंत्रविद्या जाणणारा असल्याचे सांगत असे आणि त्याची विजय जैन यांच्याशी ओळख होती. दोघांमध्ये गुप्त खजिना शोधण्याबाबत चर्चा सुरू होती. परासिया नदीच्या पात्रात मोठा खजिना दडलेला असल्याची त्याची अंधश्रद्धा होती.
पोलिसांच्या माहितीनुसार, ७ जुलै रोजी प्रल्हाद साहू, त्याचा साथीदार करीम आणि मुलगा टीकम साहू यांनी विजय जैन यांना मोटारसायकलवरून नदीकाठी नेले. तेथे तंत्रक्रिया सुरू असताना प्रल्हाद अचानक, “धरती गरम होत आहे, तिला बळी हवा आहे,” असे ओरडला. त्यानंतर तिघांनी मिळून विजय जैन यांना पकडले आणि कुऱ्हाडीने गळा चिरून त्यांची हत्या केली. या प्रकरणात पोलिसांनी तिन्ही आरोपींना अटक केली असून पुढील तपास सुरू आहे.
