खेड (प्रतिनिधी) : खेड शहराच्या सामाजिक आणि वैभवशाली परंपरेला साजेसा प्रामाणिकपणाचा आदर्श रिक्षाचालक सिकंदर कुंभार्लीकर यांनी समाजासमोर ठेवला आहे. आठ महिन्यांपूर्वी अहमद चौगुले यांचे हरवलेले पाकीट रिक्षाचालक सिकंदर कुंभार्लीकर यांना मिळाले. या पाकिटामध्ये तब्बल चार हजार दोनशे रुपये तसेच महत्त्वाची कागदपत्रे होती. विशेष म्हणजे, आठ महिन्यांनंतरही त्यांनी पाकीट त्यातील सर्व रक्कम आणि कागदपत्रांसह जसेच्या तसे अहमद चौगुले यांच्याकडे परत केले.
सिकंदर कुंभार्लीकर हे भारतीय जनता पार्टी रिक्षा संघटनेशी संबंधित रिक्षाचालक आहेत. पाकीट मिळाल्यानंतर त्यातील रोख रक्कम अथवा कागदपत्रांचा स्वतःसाठी वापर न करता त्यांनी ते सुरक्षितपणे जपून ठेवले. आठ महिन्यांनंतर संबंधित व्यक्तीचा शोध घेऊन पाकीट परत केल्याने त्यांच्या प्रामाणिकपणाचे सर्वत्र कौतुक होत आहे.
अहमद चौगुले यांच्या वतीने सिकंदर कुंभार्लीकर यांचा विशेष सत्कार करण्यात आला. यावेळी भाजपा नेते तथा खेड नगर परिषदेचे माजी नगराध्यक्ष ॲड. वैभवजी खेडेकर, युसूफ चौगुले, वहिद चौगुले, भाजपा अल्पसंख्याक सेलचे रत्नागिरी जिल्हाध्यक्ष तथा खेड नगर परिषदेचे नगरसेवक गटनेते रहीम भाई साहिबोल, भाजपा युवा मोर्चाचे रत्नागिरी जिल्हा सरचिटणीस ॲड. मिलिंद उर्फ दादू नांदगांवकर, साजिद रावल आणि भाजपा सोशल मीडिया प्रमुख सर्वेश पवार उपस्थित होते.
सिकंदर कुंभार्लीकर यांच्या या कृतीमुळे समाजामध्ये प्रामाणिकपणा, विश्वास आणि माणुसकीचा सकारात्मक संदेश गेला आहे. रिक्षाचालक हा केवळ प्रवाशांना त्यांच्या गंतव्यस्थानी पोहोचवणारा व्यक्ती नसून समाजाचा एक महत्त्वाचा घटक आहे, हे त्यांच्या कृतीतून अधोरेखित झाले आहे.
यावेळी बोलताना ॲड. वैभवजी खेडेकर यांनी सिकंदर कुंभार्लीकर यांच्या प्रामाणिकपणाचे कौतुक केले. समाजामध्ये चांगला आदर्श निर्माण करण्याचा त्यांनी प्रयत्न केला असून, त्यांच्या या कृतीतून इतर रिक्षाचालकांनीही प्रेरणा घ्यावी. भविष्यात प्रत्येकाने अशाच प्रकारे प्रामाणिकपणा आणि माणुसकी जपावी, असे आवाहन त्यांनी केले.
आठ महिन्यांपूर्वी हरवलेले पाकीट त्यातील रोख रक्कम आणि महत्त्वाची कागदपत्रे यांच्यासह परत करून सिकंदर कुंभार्लीकर यांनी खेड शहराच्या सामाजिक संस्कृतीत प्रामाणिकपणाचा एक आदर्श निर्माण केला आहे.
