विद्यार्थ्यांनी साकारले आकर्षक आकाशकंदील आणि पणत्या; नवनिर्मितीचा घेतला आनंद
गुहागर प्रतिनिधी :
जिल्हा परिषद पूर्ण प्राथमिक केंद्रशाळा, गुहागर नं. २ येथे दिवाळीच्या पूर्वसंध्येला हस्तकौशल्य विषयांतर्गत कार्यानुभव विषयाची विशेष कार्यशाळा उत्साहपूर्ण वातावरणात आयोजित करण्यात आली. या कार्यशाळेत विद्यार्थ्यांना आकर्षक आकाशकंदील व पणत्या तयार करण्याचे प्रात्यक्षिक ज्ञान देण्यात आले.
पुस्तकी ज्ञानाबरोबरच विद्यार्थ्यांमध्ये सर्जनशीलता, कल्पकता, कलात्मकता आणि स्वयंनिर्मितीची आवड निर्माण व्हावी, या उद्देशाने या उपक्रमाचे आयोजन करण्यात आले होते. शिक्षकांच्या मार्गदर्शनाखाली विद्यार्थ्यांनी विविध रंगांचे कागद, सजावटीचे साहित्य आणि उपलब्ध वस्तूंचा कल्पकतेने वापर करून सुंदर आकाशकंदील तयार केले. तसेच आकर्षक पणत्या तयार करण्याचे कौशल्यही आत्मसात केले.
विद्यार्थ्यांनी स्वतःच्या हातांनी तयार केलेल्या कलाकृतींचे शाळेत प्रदर्शन भरविण्यात आले. आपल्या कल्पनेतून साकारलेली वस्तू पाहताना विद्यार्थ्यांच्या चेहऱ्यावर आनंद आणि समाधान दिसून येत होते. या उपक्रमामुळे विद्यार्थ्यांना केवळ हस्तकौशल्याचे ज्ञान मिळाले नाही, तर श्रमप्रतिष्ठा, स्वावलंबन, समूहकार्य आणि सर्जनशील विचारांचीही शिकवण मिळाली.
या उपक्रमप्रसंगी केंद्रप्रमुख डॉ. मनोज पाटील, शाळेच्या मुख्याध्यापिका मनीषा शिंदे मॅडम, शिक्षिका स्नेहा लोंढे मॅडम, निधी सावंत मॅडम तसेच विषयशिक्षक शिवानंद साखरे सर उपस्थित होते. उपस्थित मान्यवरांनी विद्यार्थ्यांनी तयार केलेल्या कलाकृतींचे कौतुक करून त्यांना प्रोत्साहन दिले.
शाळेतील अशा कार्यानुभवाधारित उपक्रमांमुळे विद्यार्थ्यांच्या सुप्त कलागुणांना वाव मिळतो. शिकणे अधिक आनंददायी आणि कृतीशील बनते. विद्यार्थ्यांनी स्वतःच्या हातांनी तयार केलेल्या आकाशकंदिलांच्या प्रकाशातून त्यांच्या कल्पकतेचा आणि सर्जनशीलतेचा सुंदर आविष्कार पाहायला मिळाला.
दिवाळीच्या प्रकाशपर्वाच्या निमित्ताने विद्यार्थ्यांच्या कल्पकतेला मिळालेली ही नवी झळाळी शाळेच्या शैक्षणिक उपक्रमशीलतेचे प्रतीक ठरली.
