रहिवाशांच्या तक्रारीनंतर मोठी मोहीम; बेकायदेशीर बदलांवर कडक कारवाई
शहरात पाच दिवसांत ६५० मॉडिफाइड बाईक्स जप्त
खराडी परिसरात वाढलेल्या ‘बुलेट नॉइज’च्या त्रासाविरोधात पोलिसांनी मोठी कारवाई करत ४५ दुचाकी जप्त केल्या. बेकायदेशीरपणे बदललेले सायलेन्सर काढून ते बुलडोझरने चिरडण्यात आले. रहिवाशांच्या सततच्या तक्रारींनंतर ही मोहीम राबवण्यात आली. पोलिसांनी मोटार वाहन कायद्याचे उल्लंघन करणाऱ्यांवर कठोर कारवाईचा इशारा दिला आहे. दरम्यान, पुणे वाहतूक पोलिसांनी पाच दिवसांत शहरभरातून ६५० मॉडिफाइड सायलेन्सर असलेल्या मोटारसायकली जप्त केल्या आहेत.
पुणे : खराडी पोलिसांनी ‘बुलेट नॉइज’च्या वाढत्या त्रासावर लगाम घालण्यासाठी मंगळवारी विशेष मोहीम राबवत बेकायदेशीररीत्या बदललेले सायलेन्सर असलेल्या ४५ दुचाकी जप्त केल्या. जप्त केलेले सुधारित एक्झॉस्ट बुलडोझरने चिरडून नष्ट करण्यात आले.
रहिवाशांनी तक्रार केली होती की, या मॉडिफाइड सायलेन्सरमधून फटाक्यासारखा कर्णकर्कश आवाज येत असून परिसर अक्षरशः युद्धभूमीसारखा झाला आहे. अनेक तरुण कंपनी-फिट सायलेन्सर काढून टाकून मोठा आवाज निर्माण करणारे बदललेले एक्झॉस्ट बसवत असल्याचे पोलिसांनी सांगितले.
गस्ती दरम्यान पोलिसांनी प्रमुख रस्त्यांवर नाकाबंदी करून मोठ्या आवाजाच्या दुचाकींना अडवले. जागेवरच सुधारित सायलेन्सर काढून मूळ कंपनी-मान्य एक्झॉस्ट बसवण्यात आले आणि संबंधितांवर मोटार वाहन कायद्यानुसार कारवाई करण्यात आली.
वरिष्ठ निरीक्षक संजय चव्हाण यांनी सांगितले की, सार्वजनिक शांतता अबाधित ठेवण्यासाठी ही मोहीम राबवण्यात आली. “सुधारित सायलेन्सर बेकायदेशीर असून ते सुरक्षिततेलाही धोका निर्माण करतात. अशा प्रकारांवर कठोर कारवाई सुरूच राहील,” असे त्यांनी स्पष्ट केले.
स्थानिक रहिवासी नेहा सातव यांनी सांगितले की, रात्री उशिरा होणारा आवाज लहान मुले आणि ज्येष्ठ नागरिकांसाठी त्रासदायक ठरत होता. आयटी व्यावसायिक रोहन मेहता यांनीही घरातून काम करताना आणि झोपताना होणाऱ्या अडथळ्याबाबत नाराजी व्यक्त केली.
ही कारवाई पोलिस उपनिरीक्षक राहुल कोळपे यांच्या नेतृत्वाखाली करण्यात आली. नागरिकांनी अशा प्रकारांची तात्काळ माहिती पोलिसांना देण्याचे आवाहन करण्यात आले आहे.
दरम्यान, पोलिस उपायुक्त (वाहतूक) हिंमत जाधव यांनी सांगितले की, गेल्या पाच दिवसांत शहरातील वाघोली, येरवडा, कात्रज, सिंहगड रोड, वारजे आदी भागांतून ६५० मॉडिफाइड मोटारसायकली जप्त करण्यात आल्या. दंड वसूल केल्यानंतरच ही वाहने सोडण्यात येणार असून, संबंधित तरुणांसाठी समुपदेशन सत्र आयोजित करण्याचाही विचार सुरू आहे.
