पहाटे लागलेल्या आगीत अनेक कुटुंबांचा होरपळून अंत
एसी स्फोट किंवा शॉर्ट सर्किटची शक्यता; तपास सुरू
पूर्व दिल्लीतील विवेक विहार परिसरात चार मजली इमारतीला लागलेल्या भीषण आगीत नऊ जणांचा मृत्यू झाला आहे. पहाटेच्या सुमारास लागलेल्या या आगीत अनेक जण झोपेत असल्याने त्यांना सुटण्याची संधी मिळाली नाही. प्राथमिक माहितीनुसार एसी स्फोट किंवा शॉर्ट सर्किटमुळे आग लागल्याचा अंदाज व्यक्त केला जात आहे. अग्निशमन दलाने सुमारे चार तासांच्या प्रयत्नांनंतर आग नियंत्रणात आणली. या घटनेमुळे परिसरात हळहळ व्यक्त होत असून प्रशासनाने तपास सुरू केला आहे.
नवी दिल्ली : पूर्व दिल्लीतील विवेक विहार फेज-1 येथे रविवारी पहाटे एका चार मजली निवासी इमारतीला भीषण आग लागून 9 जणांचा मृत्यू झाला. दिल्ली पोलिस आणि अग्निशमन दलाला पहाटे 3.47 वाजता पीसीआर कॉल मिळाल्यानंतर तात्काळ घटनास्थळी पथके दाखल झाली.
आग दुसऱ्या, तिसऱ्या आणि चौथ्या मजल्यावरील फ्लॅट्समध्ये वेगाने पसरली आणि सुमारे चार तासांच्या प्रयत्नांनंतर सकाळी 8 वाजता ती नियंत्रणात आणण्यात आली. या दरम्यान सुमारे 15 जणांची सुटका करण्यात आली, मात्र इमारतीच्या विविध भागांतून 9 मृतदेह बाहेर काढण्यात आले.
मृतांमध्ये एका कुटुंबातील पाच जणांचा समावेश आहे, ज्यात अरविंद (60), अनिता (58), निशांत (35), आंचल (33) आणि दीड वर्षाचा आकाश यांचा समावेश आहे. याशिवाय शिखा जैन (45) तसेच नितीन जैन (50), शैली (48) आणि सम्यक (25) यांचाही मृत्यू झाला आहे.
नवीन जैन (48) हे सुमारे 30 टक्के भाजले असून त्यांच्यावर गुरु तेग बहादूर रुग्णालयात उपचार सुरू आहेत. अनेक रहिवासी झोपेत असल्याने त्यांना बाहेर पडता आले नाही, तर लोखंडी ग्रील आणि बंद खिडक्यांमुळे बचावकार्य अडथळ्यात आले.
प्राथमिक माहितीनुसार आग एसी स्फोट किंवा शॉर्ट सर्किटमुळे लागली असावी, मात्र अधिकृत कारण अद्याप स्पष्ट झालेले नाही. पोलिसांनी मृतदेह पोस्टमार्टमसाठी पाठवले असून काहींची ओळख पटवण्यासाठी डीएनए चाचणी केली जाणार आहे.
मुख्यमंत्री रेखा गुप्ता यांनी या घटनेबद्दल दुःख व्यक्त करत पीडित कुटुंबांना मदतीचे आश्वासन दिले आहे. स्थानिक प्रशासन, अग्निशमन दल आणि आपत्ती व्यवस्थापन पथके घटनास्थळी मदतकार्य करत आहेत.
पोलिसांकडून घटनेचा सखोल तपास सुरू असून सर्व शक्यता पडताळून पाहिल्या जात आहेत.
