भटके विमुक्त आघाडी जिल्हाध्यक्ष नवलराज काळे यांनी विरोधकांना ठणकावले
वैभववाडी : धनगर आरक्षण, ओबीसी (Other Backward Classes) आरक्षण, आणि मराठा आरक्षणाबाबत विरोधकांनी विधान भवनात कधीच ठोस भूमिका घेतली नाही. मतांच्या राजकारणासाठी आरक्षणाचा वापर केला जाऊ नये, असेही श्री. काळे म्हणाले. विरोधक सध्या भारतीय जनता पार्टी महायुतीच्या उमेदवारांच्या विरोधात आरक्षणाचा मुद्दा घेऊन प्रचार करत आहेत. परंतु धनगर, मराठा, आणि ओबीसी समाजाच्या आरक्षणाच्या समर्थनार्थ विरोधकांपैकी कोणताही नेता कधीच त्यांच्या बाजूने उभा राहिला नाही, हे सर्वश्रुत आहे. त्यामुळे विरोधकांची आरक्षणाबाबतची दुटप्पी भूमिका समाजासमोर आली आहे. त्यांच्या प्रचारात विकासाचा कोणताही ठोस मुद्दा नसल्यामुळे विरोधक भारतीय जनता पार्टी आणि महायुतीची बदनामी करण्याचा प्रयत्न करत आहेत. अशा परिस्थितीत आरक्षणाचा मुद्दा घेऊन मत मागण्याचा त्यांना कोणताही नैतिक अधिकार नाही, असे श्री. काळे यांनी नमूद केले.
ही निवडणूक विकासाच्या मुद्द्यावर लढवली जाईल, असा ठाम विश्वासही त्यांनी व्यक्त केला. महायुतीच्या उमेदवारांनी आपल्या मतदारसंघात केलेले काम आणि पुढे करावयाचे काम यावर भर देऊन प्रचार करण्याचा निर्धार श्री. काळे यांनी दर्शवला. आरक्षणाच्या बाबतीत खरी भूमिका कोणी घेतली हे जनतेला ठाऊक आहे. महाविकास आघाडीच्या सत्ताकाळात ओबीसींचे राजकीय आरक्षण संपविण्याचा प्रयत्न झाला होता. त्यावेळी मुख्यमंत्री उद्धव ठाकरे होते. परंतु महायुतीचे सरकार आल्यावर ओबीसींचे राजकीय आरक्षण पुन्हा बहाल करण्यात आले, ज्यामुळे स्थानिक स्वराज्य संस्थांच्या निवडणुका ओबीसी आरक्षणासह घेता आल्या. यामुळे आरक्षणाच्या मुद्द्यावर विरोधात कोण आहे, हे स्पष्ट झाले आहे.
संपूर्ण देशाने पाहिले आहे की महाविकास आघाडीतील घटक पक्षांचे नेते आणि भारत सरकार विरोधी पक्षनेते राहुल गांधी यांनी देशाबाहेर जाऊन आरक्षणविरोधी भूमिका घेतली होती. त्यामुळे आरक्षण संपवण्याचा प्रयत्न कोण करीत आहे, हे जनतेला पूर्णतः ज्ञात आहे. विरोधकांनी आरक्षणावर बोलणे टाळावे, अशी विनंती श्री. काळे यांनी केली. जनता सुज्ञ आहे, समाज सुशिक्षित आहे; त्यामुळे अनावश्यक प्रचार करताना विरोधकांनी केविलवाणे प्रयत्न करू नयेत, असा सल्ला त्यांनी दिला.
सिंधुदुर्ग जिल्ह्यातील तिन्ही जागेवर महायुतीचा विजय निश्चित आहे, असा विश्वास श्री. काळे यांनी व्यक्त केला. महायुतीच्या माध्यमातून भटके विमुक्त आणि ओबीसी समाजाला न्याय मिळत आहे. राज्य आणि केंद्र सरकारने विविध योजनांच्या माध्यमातून त्यांना आधार दिला आहे. जिल्ह्यात तांडा वस्ती सुधार योजनेतून निधीही उपलब्ध झाला असून आचारसंहिता संपल्यानंतर त्याची अंमलबजावणी सुरू होईल. राज्यातील भटक्या विमुक्तांना चार वर्षांत पाच लाख घरे देण्याचे महत्त्वपूर्ण काम राज्य सरकारने केले आहे.
भाजप नेते देवेंद्र फडणवीस आणि मुख्यमंत्री एकनाथ शिंदे यांच्या नेतृत्वाखाली राजे उमाजी नाईक महामंडळ, गोसावी महामंडळ आणि इतर मंडळांच्या माध्यमातून भटके विमुक्त समाजाचा विकास करण्यात येत आहे. राज्यातील लाडकी बहिणी योजना, तसेच केंद्र शासनाच्या पंतप्रधान किसान सन्मान योजना या माध्यमातून आर्थिक पाठबळ मिळाले आहे. जलजीवन मिशनच्या माध्यमातून वाडी- वस्त्यांवर पाणी पोहोचले असून या सर्व यशाचे श्रेय महायुतीच्या नेत्यांना जाते.
श्री. नवलराज काळे यांनी पुढे सांगितले की, आमदार नितेश राणे यांनी जिल्ह्यातील धनगर वस्त्या आणि भटके विमुक्त समाजाच्या उन्नतीसाठी मोठे कार्य केले आहे, ज्यामुळे संपूर्ण समाज त्यांच्या पाठीशी उभा राहणार आहे. कुडाळ-मालवण मतदारसंघातून निलेश राणे, तसेच सावंतवाडी विधानसभा मतदारसंघातून दीपक केसरकर मोठ्या मतांनी विजयी होतील, असा आत्मविश्वास श्री. काळे यांनी व्यक्त केला. महायुतीचे उमेदवार मोठ्या प्रमाणात प्रचार करतील, असेही त्यांनी आवाहन केले आहे.
