सावंतवाडी: सिंधुदुर्ग जिल्हा चर्मकार समाज उन्नती मंडळ, सिंधुदुर्ग शाखा-सावंतवाडी यांच्या वतीने रविवार, २२ जून २०२५ रोजी सायंकाळी ३.३० वाजता भारतरत्न डॉ. बाबासाहेब आंबेडकर (समाज मंदिर), सावंतवाडी येथे वार्षिक सर्वसाधारण सभेचे आयोजन करण्यात आले आहे. ही सभा तालुका अध्यक्ष श्री. गणेश म्हापणकर यांच्या अध्यक्षतेखाली पार पडेल.
या महत्त्वपूर्ण सभेत विविध विषयांवर चर्चा करून निर्णय घेतले जाणार आहेत. सभेच्या विषयपत्रिकेमध्ये सभेच्या सूचना पत्रांचे वाचन, दिवंगत समाज बांधवांना व सैनिक जवानांना श्रद्धांजली वाहणे, मागील वार्षिक सर्वसाधारण सभेचे इतिवृत्त वाचून कायम करणे, तसेच सन २०२४ ते ३१ मे २०२५ पर्यंतच्या जमाखर्चाचे वाचन करून त्यास मंजुरी घेणे यांचा समावेश आहे. याव्यतिरिक्त, सभासदांकडून आलेल्या सूचनांवर चर्चा करून निर्णय घेतले जातील आणि अध्यक्षांच्या परवानगीने आयत्यावेळच्या सूचनांवरही विचारविनिमय होईल.
या सभेतील एक महत्त्वाचा विषय म्हणजे सन २०२५ ते सन २०२८ या कालावधीसाठी नवीन कार्यकारिणीची निवड/निवडणूक करणे. सभेच्या शेवटी आभार प्रदर्शन करून समारोप होईल.
मंडळाचे सचिव श्री. जी. बी. चव्हाण यांनी दिलेल्या माहितीनुसार, ही सभा आजीव व पुरस्कर्ता सभासदांसाठी आहे. त्यांनी आपल्या सूचना व शिफारशी सभेपूर्वी लेखी स्वरूपात मंडळाकडे पाठवाव्यात असे आवाहन करण्यात आले आहे. गणपूर्ती न झाल्यास, सभा अर्ध्या तासाने त्याच ठिकाणी होईल आणि त्यावेळी गणसंख्येची अट नसेल.
तालुका अध्यक्ष श्री. गणेश म्हापणकर आणि सचिव श्री. गुंडू चव्हाण यांनी सर्व आजीव व पुरस्कर्ता सभासदांना या महत्त्वपूर्ण सभेला वेळेत उपस्थित राहण्याचे नम्र आवाहन केले आहे.
