सिंधुदुर्ग जिल्हा चर्मकार समाज उन्नती मंडळातर्फे राबविणार उपक्रम
सावंतवाडी । प्रतिनिधी : सिंधुदुर्ग जिल्हा चर्मकार समाज उन्नती मंडळातर्फे समाजातील युवकांची एक मजबूत फळी तयार करून त्यांना उच्च शिक्षणासाठी मार्गदर्शन करण्यात येणार असल्याची घोषणा मंडळाचे जिल्हाध्यक्ष सुजित जाधव यांनी सावंतवाडी येथे केली. यासाठी शासनाकडून ५ लाख रुपयांचा निधी प्रस्ताव असल्याचेही त्यांनी सांगितले. आगामी दोन वर्षांत ओरोस हुमरमळा येथील संत रोहिदास समाज भवन पूर्ण करण्याचा मानसही त्यांनी व्यक्त केला.
श्री पंचम खेमराज महाविद्यालयात आयोजित सिंधुदुर्ग जिल्हा चर्मकार समाज उन्नती मंडळाच्या सावंतवाडी शाखा विद्यार्थी गुणगौरव व सत्कार समारंभात ते बोलत होते. यावेळी बोलताना जाधव म्हणाले की, समाजातील बांधव केवळ आपल्यापुरते मर्यादित न राहता इतर समाजांच्या मदतीला धावून येतात, ही कौतुकास्पद बाब आहे. प्रत्येक तालुक्यातील विद्यार्थ्यांना दत्तक घेऊन पाचवीपासून त्यांच्या उच्च शिक्षणाची सोय केली जाईल, असे त्यांनी सांगितले. शिक्षण आणि आरक्षणाच्या जोडीला विद्यार्थ्यांनी प्रत्येक क्षेत्रात अव्वल असले पाहिजे, असे मत त्यांनी व्यक्त केले.
चर्मोद्योगाला आधुनिकतेची जोड
जाधव यांनी चर्मोद्योगाकडे पाहण्याचा लोकांचा दृष्टिकोन बदलत असल्याचे नमूद केले. या व्यवसायाला चालना देण्यासाठी भरघोस निधी उपलब्ध आहे, त्यामुळे पारंपरिक कामाऐवजी अत्याधुनिक पद्धतीने पादत्राणे बनवण्याचा व्यवसाय सुरू करण्याचे आवाहन त्यांनी केले. तसेच, समाज बांधवांकडे जाणाऱ्या पायवाटा मोकळ्या करण्यासाठी लवकरच मोहीम हाती घेतली जाईल, असेही ते म्हणाले.
मान्यवरांची उपस्थिती आणि सत्कार
कार्यक्रमाचे उद्घाटन सावंतवाडी शाखा उपाध्यक्ष आणि जिल्हा मंडळाचे सहसचिव बाबुराव चव्हाण यांच्या हस्ते दीपप्रज्वलन करून झाले. कार्यक्रमाच्या अध्यक्षस्थानी सावंतवाडी तालुकाध्यक्ष विनायक चव्हाण होते. जिल्हा बँकेचे संचालक आत्माराम ओटवणेकर, एलआयसीचे मुख्य अभियंता रवी किशोर चव्हाण, सावंतवाडी पंचायत समितीचे सहाय्यक गटविकास अधिकारी मंगेश जाधव, शाखेचे सल्लागार परशुराम चव्हाण यांच्यासह अनेक मान्यवर उपस्थित होते.
यावेळी बोलताना बाबुराव चव्हाण यांनी गेल्या ३२ वर्षांपासून समाजकार्य करत असल्याचे सांगितले आणि यापुढेही करत राहणार असल्याचे सांगितले. रवी किरण चव्हाण यांनी स्पर्धा परीक्षेत उत्तीर्ण झालेल्या पालकांनी आपल्या मुलांवर विशेष लक्ष द्यावे असे आवाहन केले. तालुकाध्यक्ष विनायक चव्हाण यांनी भविष्यात पारंपरिक शस्त्रांचे प्रदर्शन भरवणार असल्याचे आणि गावागावात दौरा काढून तरुणांची संघटना मजबूत करणार असल्याचे सांगितले.
कार्यक्रमात सुमारे ७५ गुणवंत विद्यार्थ्यांचा सत्कार करण्यात आला. यामध्ये सहाय्यक पोलीस निरीक्षक शेखर दाभोलकर, एसटी महामंडळाचे आगार व्यवस्थापक प्रवीण साळगावकर, तसेच डॉक्टर, इंजिनिअर, दहावी-बारावीचे गुणवंत विद्यार्थी आणि २२ वर्षे सैन्यदलात सेवा बजावलेले माजी सैनिक चंद्रकांत पवार यांचा सपत्नीक सत्कार करण्यात आला. पारंपरिक व्यवसाय सुरू ठेवणाऱ्यांचाही सत्कार करण्यात आला.
यावेळी पदोन्नती मिळालेल्या, सेवानिवृत्त झालेल्या आणि विशेष कार्य केलेल्या अनेक मान्यवरांचा सत्कार करण्यात आला. कार्यक्रमासाठी श्री पंचम खेमराज महाविद्यालयाने हॉल विनामूल्य उपलब्ध करून दिल्याबद्दल युवराज लखमराजे भोसले यांचे आभार मानण्यात आले.
