वाटद : ग्रामविकास मंडळ, वाटद मिरवणे या संस्थेचे कर्तव्यनिष्ठ कार्यवाह आणि निवृत्त कृषी अधिकारी प्रकाश कारखानीस यांच्या आकस्मिक निधनामुळे संस्थेवर शोककळा पसरली आहे. त्यांच्या निधनानंतर संस्थेच्या ग्रंथालयात आयोजित करण्यात आलेल्या शोक सभेत, पदाधिकारी, शिक्षक आणि मित्र परिवाराने त्यांच्या अतुलनीय योगदानाला आदराने अभिवादन केले.
कारखानीस यांनी संस्थेचे कार्यवाह म्हणून अत्यंत मोलाचे काम केले. त्यांच्या कार्यकाळात त्यांनी संस्थेच्या कार्याला एक नवी दिशा दिली. विद्यार्थ्यांशी, शिक्षकांशी आणि संस्थेच्या सदस्यांशी त्यांचे असलेले संवाद कौशल्य वाखाणण्याजोगे होते. त्यांनी नवनवीन उपक्रम केवळ सुरूच केले नाहीत, तर ते यशस्वी करण्यासाठी स्वतःला पूर्णपणे झोकून दिले. त्यांच्या याच गुणांमुळे संस्थेच्या प्रगतीला गती मिळाली.
या शोक सभेला संस्थेचे अध्यक्ष डॉ. वैद्य, शाळा समितीचे अध्यक्ष श्री. बाळशेठ जोग यांच्यासह महालक्ष्मी महिला पतसंस्थेचे संचालक, खंडाळा इंग्लिश मीडियम शाळेचे मुख्याध्यापक आणि शिक्षक वर्ग उपस्थित होते. तसेच, कुसुमताई ग्रंथालयाचे श्रीकृष्ण साबणे, बापट सर (रत्नागिरी) आणि युयुत्सू आर्ते सर (देवरूख) यांनीही खास उपस्थिती लावली.
संस्थेचे सचिव श्री. सुधाकर शिर्के यांनी प्रास्ताविक भाषणात कारखानीस यांच्या कार्याचा गौरव केला. संस्थेचे संस्थापक श्री. निमकर यांनी समारोपाच्या भाषणात, कारखानीस यांच्या योगदानाला उजाळा देत, त्यांचे अपूर्ण राहिलेले कार्य पुढे नेण्यासाठी सर्वांनी मिळून प्रयत्न करण्याचे आवाहन केले. कारखानीस यांचा जनसंपर्क, दूरदृष्टी आणि समन्वय साधण्याची क्षमता ही त्यांच्या व्यक्तिमत्त्वाची खास वैशिष्ट्ये होती, असेही श्री. निमकर यांनी नमूद केले.
याप्रसंगी, शोक व्यक्त करताना अनेक मान्यवरांनी त्यांच्या आठवणींना उजाळा दिला. प्राध्यापक डॉ. सागर दिघे यांनी त्यांच्या जावई म्हणून त्यांचे विचार आणि कार्यशैलीबद्दल सांगितले. त्यांच्या निधनाने केवळ संस्थाच नव्हे, तर संपूर्ण परिसराची मोठी हानी झाली आहे. त्यांच्या आत्म्यास सद्गती लाभो, अशी प्रार्थना करत सभेचा समारोप करण्यात आला.
