मोती तलावाकाठी श्री देव वेतोबाचे आकर्षक व भव्य ‘ कट आऊट ‘

क्षेत्रपाल श्री देव वेतोबा मालिकेचा सोमवारी सावंतवाडीत भव्य ” प्रिमियर “

सावंतवाडी । प्रतिनिधी : सिंधुदुर्ग जिल्ह्यातील जागृत देवस्थान म्हणून ओळखल्या जाणार्‍या क्षेत्रपाल श्री देव वेतोबावर आधारित मालिकेेचा भव्य “ प्रिमियर” सावंतवाडी शहरात १७ जुलैला होत आहे. या पार्श्वभूमीवर श्री देव वेतोबाची भूमिका साकारणार्‍या कलाकारांसोबत अन्य कलाकार, निर्माता दिग्दर्शक व तंत्रज्ञ यां ना भेटण्याची संधी प्रेक्षकांना उपलब्ध करुन दिली जाणार आहे, अशी माहिती सन मराठीचे प्रसिध्दीप्रमुख विनय नलावडे व कॉमेडी एक्सप्रेस फेम अभिनेते आशिष पवार यांनी दिली.
सन मराठीवर प्रसिध्द होणारी “क्षेत्रपाल श्री देव वेतोबा” ही सिरीयल १७ तारखेपासून सुरू होत आहे. या पार्श्वभूमीवर आयोजित करण्यात आलेल्या या प्रमोशन शो ची माहिती देण्यासाठी आयोजित पत्रकार परिषदेत ते बोलत होते. यावेळी समन्वयक वैभव केंकरेही उपस्थित होते.
दरम्यान, या प्रमोशनच्या पार्श्वभूमीवर संस्थानकालीन राजवाड्याकडे तीस फुटी वेतोबाचे कट आऊट उभारण्यात आले असून सावंतवाडीकर नागरिकांसाठी ते एक आकर्षण ठरले आहे. याच ठिकाणी सोमवारी १७ जुलै रोजी सायंकाळी ६ वाजता श्री देव वेतोबाची आरती करुन शहरात रॅली काढण्यात येणार आहे. त्यानंतर येथील वैश्य भवनात खास महिलांसाठी ‘आनंदी सोहळा ‘ आयोजित करण्यात आला आहे. यात अभिनेते आशिष पवार होम मिनिस्टरच्या धरतीवर फनी गेम्स् आणि मनोरंजनाचे कार्यक्रम घेणार आहेत, असेही त्यांनी यावेळी सांगितले.

एखाद्या चित्रपटाचा प्रीमियर शो होतो. मात्र, या धर्तीवर प्रथमच वेतोबा या मालिकेचा प्रीमियर शो कोकणात होत आहे. क्षेत्रफळ श्री देव वेतोबा ही मालिका १७ जुलैपासून प्रेक्षकांच्या भेटीला येत आहे. विशेषतः कोकणातील देवांमध्ये वेतोबाला मोठे स्थान आहे. येथील क्षेत्राचे आणि जनतेचे तो रक्षण करतो अशी येथील प्रत्येकाची भावना आहे. हीच श्रद्धा या मालिकेतून प्रेक्षकांना दाखवली जाणार आहे, असे त्यांनी सांगितले.
या मालिकेचे भव्य लॉन्चिंग सावंतवाडीत होणार असून याच पार्श्वभूमीवर सन मराठीच्या प्रमोशनसाठी सुरू असलेला “आनंदी सोहळा” हा कार्यक्रम महिलांसाठी घेण्यात येणार आहे. या कार्यक्रमाचे निवेदन आपण स्वतः करणार असून हा कार्यक्रम सन मराठीच्या यूट्यूब चॅनल वर प्रसिद्ध केला जाणार आहे. तरी जास्तीत जास्त महिलांनी या आनंदी सोहळ्यात सहभागी व्हावे. आतापर्यंत सत्तावीस शो हाऊसफुल झाले असून यातील बारा शो सिंधुदुर्ग जिल्ह्यामध्ये होणार असल्याचे त्यांनी सांगितले. तसेच प्रमोशन शो पाहण्याची आणि कलाकारांना भेटण्याची सुद्धा संधी घ्यावी, असे आवाहनही त्यांनी केले.