खराडीतील मल्टिप्लेक्स परिसरात पहाटे थरार
डोक्याला 13 टाके, आरोपी फरार
पुण्यातील खराडी परिसरात चित्रपट पाहताना हसल्याच्या कारणावरून एका 18 वर्षीय तरुणावर अमानुष हल्ला झाल्याची धक्कादायक घटना समोर आली आहे. मल्टिप्लेक्सबाहेर तिघा अज्ञात हल्लेखोरांनी तरुणाला बेदम मारहाण केली. या हल्ल्यात तरुणाच्या डोक्याला गंभीर दुखापत होऊन 13 टाके पडले आहेत. त्याच्या मित्रालाही मारहाण करण्यात आली. पोलिसांनी गुन्हा दाखल केला असून आरोपींचा शोध सुरू आहे.
पुणे : ब्लॉकबस्टर चित्रपट ‘धुरंदर’ पाहताना जोरजोरात हसल्याच्या कारणावरून खराडीतील एका मल्टिप्लेक्सबाहेर 18 वर्षीय तरुणावर जीवघेणा हल्ला करण्यात आला. या घटनेत सलूनमध्ये काम करणाऱ्या तरुणाच्या डोक्याला 13 टाके पडले आहेत. हल्ल्यानंतर आरोपी स्कूटरवरून फरार झाले.
या प्रकरणात अर्जुन राजेंद्रकुमार दिवाकर असे जखमी तरुणाचे नाव असून, पहाटे सुमारे 1.35 वाजता ही घटना घडली. चित्रपट संपल्यानंतर दिवाकर आणि त्याचा मित्र थिएटरमधून बाहेर पडत असताना तिघा हल्लेखोरांनी त्यांना अडवले. हल्ल्यात दिवाकर गंभीर जखमी झाल्याने त्यांना तातडीने जवळच्या रुग्णालयात दाखल करण्यात आले.
खराडी पोलिसांचे वरिष्ठ निरीक्षक संजय चव्हाण यांनी प्रहार डिजिटलला सांगितले की, “पीडित तरुणाच्या डोक्याला गंभीर दुखापत झाली असून डॉक्टरांनी 13 टाके घातले आहेत.” सध्या त्याची प्रकृती स्थिर असल्याचेही त्यांनी नमूद केले.
चव्हाण पुढे म्हणाले की, “आरोपींचा शोध सुरू असून अद्याप अटक करण्यात आलेली नाही. घटनास्थळी सीसीटीव्ही कॅमेरे आहेत. आरोपी ज्या स्कूटरवरून पळून गेले, तिचा नोंदणी क्रमांक शोधण्याचा प्रयत्न सुरू आहे.” या आधारे संशयितांची ओळख पटवली जाणार आहे.
पोलिस तपासानुसार, चित्रपट सुरू असताना दिवाकर आणि त्याचा मित्र हसत होते. हल्लेखोर त्यांच्याच शेजारी बसले होते. हसण्यावरून वाद झाला आणि शाब्दिक चकमकीनंतर हा वाद वाढत गेला. मल्टिप्लेक्सच्या बाहेर आल्यानंतर तिघांनी दोघांवर बेदम मारहाण केली.
या प्रकरणी पोलिसांनी स्वेच्छेने धोकादायक शस्त्र किंवा साधनांनी गंभीर दुखापत करणे तसेच शांतता भंग करण्याच्या उद्देशाने हेतुपुरस्सर अपमान केल्याप्रकरणी गुन्हा दाखल केला आहे. पुढील तपास सुरू आहे.
