मतदान व मतमोजणीदरम्यान अनुचित प्रकारांना आळा घालण्याचे आदेश
प्रचार बंदी व पोलिस-प्रशासन समन्वयावर भर
राज्यातील नगरपरिषद आणि नगरपंचायत निवडणुकांचे मतदान व मतमोजणी शांततेत पार पडावी, यासाठी राज्य निवडणूक आयुक्त दिनेश वाघमारे यांनी कडक प्रतिबंधात्मक उपाययोजना राबविण्याचे निर्देश दिले आहेत. 20 डिसेंबर रोजी मतदान तर 21 डिसेंबर रोजी राज्यभर एकाच वेळी मतमोजणी होणार आहे. कोणतीही अनुचित घटना घडल्यास तात्काळ कठोर कारवाई केली जाईल, असा इशारा देण्यात आला आहे. निवडणूक प्रक्रियेदरम्यान चुकीची माहिती पसरू नये यासाठी प्रशासनाला सतर्क राहण्याच्या सूचना देण्यात आल्या आहेत. प्रचार बंदीच्या नियमांची काटेकोर अंमलबजावणी करण्यावरही भर देण्यात आला आहे.
पुणे : राज्य निवडणूक आयुक्त (SEC) दिनेश वाघमारे यांनी येत्या 20 आणि 21 डिसेंबर रोजी राज्यभर होणाऱ्या नगरपरिषद व नगरपंचायत निवडणुकांचे मतदान आणि मतमोजणी शांततेत पार पाडण्यासाठी जिल्हा प्रशासन व पोलिस अधिकाऱ्यांना कडक प्रतिबंधात्मक उपाययोजना राबविण्याचे निर्देश दिले आहेत. मागील दोन दिवसांत जिल्हाधिकारी, पोलिस आयुक्त, पोलिस अधीक्षक व निवडणूक अधिकाऱ्यांशी व्हिडिओ कॉन्फरन्सिंगद्वारे तयारीचा आढावा घेतल्यानंतर हे आदेश देण्यात आले.
SEC ने स्पष्ट केले की मतदान आणि मतमोजणी मुक्त, निष्पक्ष व शांततेत पार पडली पाहिजे. कोणतीही अनुचित घटना तात्काळ आणि कठोर कारवाईला आमंत्रण देईल, असा इशाराही देण्यात आला आहे. मतदार, उमेदवार, राजकीय पक्ष आणि प्रसारमाध्यमांमध्ये गैरसमज किंवा चुकीची माहिती पसरू नये, यासाठी अंमलबजावणीबाबत त्वरित माहिती देण्याच्या सूचना अधिकाऱ्यांना देण्यात आल्या आहेत.
20 डिसेंबर रोजी काही ठिकाणी मतदान होणार असून, 21 डिसेंबर रोजी सर्व नगरपरिषदा व नगरपंचायतींमध्ये एकाच वेळी मतमोजणी केली जाणार आहे. विशेषतः निकालानंतरच्या काळात पोलिस व इतर यंत्रणांमध्ये समन्वय राखण्याची गरज असल्याचे वाघमारे यांनी नमूद केले.
तसेच 19 डिसेंबर रोजी रात्री 10 वाजेनंतर इलेक्ट्रॉनिक किंवा प्रिंट माध्यमांतून निवडणूक प्रचार करण्यास मनाई असल्याची आठवण करून देत या प्रचार बंदीची काटेकोर अंमलबजावणी करण्याचे आदेश देण्यात आले. “मुक्त, निष्पक्ष आणि शांततेत मतदान व मतमोजणी ही चर्चा करण्यायोग्य बाब नाही,” असे वाघमारे यांनी बैठकीत स्पष्ट केले.
रविवारी सकाळी 7.30 ते सायंकाळी 5.30 या वेळेत 24 नगरपरिषदा व नगरपंचायतींमध्ये 154 जागांसाठी मतदान होणार आहे. पुणे जिल्ह्यात बारामती नगरपरिषद तसेच फुरसुंगी-उरुळी देवाची नगरपंचायत निवडणुका होत असून, तळेगाव दाभाडे, लोणावळा आणि दौंड येथे निवडक जागांसाठी मतदान होणार आहे. पहिल्या टप्प्यातील 264 नगरपरिषदा व नगरपंचायतींच्या निवडणुका 2 डिसेंबर रोजी पार पडल्या असून, सर्व 288 स्थानिक स्वराज्य संस्थांची मतमोजणी 21 डिसेंबर रोजी होणार आहे.
prahar digital
