खेड (प्रतिनिधी):
खेड येथील मुख्य एस.टी. बस स्थानकावर बसमध्ये चढत असताना एका महिलेच्या बॅगेतील सोन्याचे दागिने आणि रोख रक्कम अज्ञात चोरट्याने लंपास केल्याची घटना उघडकीस आली आहे. याप्रकरणी खेड पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
मिळालेल्या माहितीनुसार, ही घटना १९ डिसेंबर २०२५ रोजी दुपारी १५.३० वाजण्याच्या सुमारास घडली. फिर्यादी महिला खेड एस.टी. स्टँडवरून खेड ते मंडणगड जाणाऱ्या बसमध्ये चढत होत्या. यावेळी गर्दीचा फायदा घेऊन अज्ञात चोरट्याने महिलेच्या काखेला असलेल्या बॅगेची चैन शिताफीने उघडली. बॅगेत ठेवलेले २ लाख रुपये किमतीच्या दोन सोन्याच्या बांगड्या, १ लाख ८० हजार रुपये किमतीची सुमारे एक तोळा आठ ग्रॅम वजनाची सोन्याची चैन आणि ५,२०० रुपये रोख, असा एकूण ३,८५,२०० रुपयांचा ऐवज चोरून नेला.
या घटनेबाबत महिलेने तक्रार दिल्यानंतर २५ डिसेंबर २०२५ रोजी दुपारी १४.४१ वाजता पोलीस दप्तरी गुन्हा नोंदवण्यात आला आहे. खेड पोलीस या प्रकरणाचा अधिक तपास करत असून प्रवाशांनी गर्दीच्या ठिकाणी आपल्या मौल्यवान वस्तूंची काळजी घेण्याचे आवाहन करण्यात आले आहे.
